काठमाडौं । पशुपति क्षेत्र विकास कोषका सदस्य सचिव मिलनकुमार थापालाई १ लाख रुपैयाँ धरौटीमा रिहा गर्न आदेश दिइएको छ ।
पशुपति शवदाह गृह मेसिन खरिदमा भ्रष्टाचार गरेको आरोप लागेका थापालाई विशेष अदालतले १ लाख रुपैयाँ धरौटीमा रिहा गर्न आदेश दिएको हो ।
सोमबार विशेष अदालतमा भएको बयान र थुनछेक बहसपछि न्यायाधीश तेज नारायण सिंह राई तथा मुरारीबाबु श्रेष्ठको संयुक्त इजलासले थापालाई धरौटीमा छाड्न आदेश दिएको हो ।
अख्तियार दुरुपयोग अनुसन्धान आयोगले असार ८ गते थापा सहित १४ जना कर्मचारी र २ वटा कम्पनीलाई प्रतिवादी बनाएर विशेष अदालतमा मुद्दा दायर गरेको थियो ।
आयोगले १० करोड ३३ लाख ९१ हजार ३० रुपैयाँको हिनामिनाको आरोपसहित बिगो असुल गर्न माग दाबी पेश गरेको छ ।
अख्तियारका अनुसार शवदाह मेसिनको मूल्य ३२ लाख ५० हजार भारतीय रुपैयाँ मात्र भए पनि सो मेसिनलाई अत्यधिक मूल्यांकन गरिएको छ ।
साथै, एक करोड ५२ लाख रुपैयाँको पेस्की भुक्तानीसमेत गरिएको र सोही आधारमा कुल १० करोडभन्दा बढीको ठेक्का सम्झौता गर्दै सार्वजनिक धनको दुरुपयोग गरिएको अख्तियारको दाबी छ ।
