काठमाडौं । काठमाडौं महानगरपालिकाभित्र महिनौंदेखि जारी गतिरोध अन्त्य हुने संकेत देखिएको छ । महानगर प्रमुख बालेन्द्र शाह (बालेन) र प्रमुख प्रशासकीय अधिकृत सरोज गुरागाईंबीचको लामो टकरावपछि अन्ततः कार्यपालिका बैठक बस्ने सहमति जुटेको हो ।
यही सहमतिका आधारमा, गत पुस ८ गतेदेखि बस्न नसकेको कार्यपालिका बैठक आजका लागि बोलाइएको छ । विवाद समाधानका लागि बिहीबार प्रमुख शाह, उपप्रमुख सुनिता डंगोल र कार्यपालिका सदस्यहरूबीच भएको छलफलले बैठकको मार्गप्रशस्त गरेको हो । सहमतिअनुसार, प्रमुख शाहले बिहान ११ बजे आगामी आर्थिक वर्षको नीति तथा कार्यक्रम र बजेटका लागि स्रोत अनुमान तथा सीमा निर्धारण समितिको बैठक बोलाएका छन् । त्यसलगत्तै उपप्रमुख डंगोल संयोजक रहेको राजस्व परामर्श समितिको बैठक बस्नेछ र दिउँसो २ बजे कार्यपालिकाको पूर्ण बैठक आयोजना हुनेछ ।
किन चर्किएको थियो विवाद ?
प्रमुख शाह र प्रमुख प्रशासकीय अधिकृत गुरागाईंबीचको विवादको जड पुरानो बसपार्कस्थित ‘काठमाडौं भ्यु टावर’ निर्माण प्रकरणसँग जोडिएको छ । गुरागाईंमाथि वातावरणीय परीक्षणबिना नै १२ तले टावरको नक्सालाई १९ तले बनाउन प्रक्रिया नपुर्याई स्वीकृत गरेको गम्भीर आरोप छ । महानगरले २०७१ सालमा निजी साझेदारीमा टावर बनाउने निर्णय गरेको थियो । यही विषयलाई लिएर प्रमुख शाहले गुरागाईंको कार्यशैलीमाथि प्रश्न उठाएपछि उनीहरूबीचको सम्बन्ध चिसिएको थियो ।
स्थानीय सरकार सञ्चालन ऐन, २०७४ अनुसार स्थानीय तहले असार १० भित्रै बजेट सभामा पेस गरिसक्नुपर्ने कानुनी प्रावधान छ । तर, आन्तरिक कलहका कारण काठमाडौं महानगरले समयसीमा गुजारिसकेको छ । समयमा बजेट ल्याउन नसक्दा राष्ट्रिय प्राकृतिक स्रोत तथा वित्त आयोगले गर्ने कार्यसम्पादन मूल्यांकनमा महानगरले कम अङ्क पाउनेछ । यसले गर्दा संघीय सरकारबाट प्राप्त हुने अनुदान रकममा समेत कटौती हुन सक्ने जोखिम बढेको छ ।
आजको बैठकका लागि दुवै पक्ष तयार देखिएका छन् । प्रमुख प्रशासकीय अधिकृत गुरागाईंले बैठकबारे जानकारी प्राप्त भएको र आफू सहभागी हुने बताएका छन् । प्रमुख शाहका प्रेस सहजकर्ता सुरेन्द्र बजगाईंले कानुनी प्रक्रियाअनुसार नै बैठक बोलाइएको बताउँदै भने, ‘बैठकमा प्रमुख प्रशासकीय अधिकृत बस्ने/नबस्ने उहाँको विवेकको कुरा हो ।
