काठमाडौं । शुक्रबारदेखि सुरु भएको इजरायल र इरानबीचको प्रत्यक्ष सैन्य द्वन्द्वले मध्यपूर्वलाई युद्धको नयाँ भुमरीमा धकेलेको छ । इजरायली आक्रमणमा इरानको रेभुलसनरी गार्डका एक उच्च अधिकारीसहित सयौँको ज्यान गएको छ भने इरानको जवाफी हमलामा इजरायलतर्फ पनि क्षति पुगेको छ ।
आइतबार राति भएको एक भीषण इजरायली आक्रमणमा इरान रेभुलसनरी गार्डका गुप्तचर प्रमुख मोहम्मद काजेमी मारिएको पुष्टि भएको छ । इरानको स्वास्थ्य मन्त्रालयका अनुसार शुक्रबारयता इजरायली हमलामा परी दुई सय २४ जना इरानी नागरिकको ज्यान गइसकेको छ । युद्धको त्रासले राजधानी तेहरानबाट हजारौँ मानिसले सहर छाड्न थालेका छन् ।
इरानले प्रहार गरेका ब्यालिस्टिक मिसाइलहरू इजरायलका प्रमुख सहर हाइफा र तेल अभिभमा खस्दा १० जनाभन्दा बढी इजरायली घाइते भएका छन् । इजरायली प्रधानमन्त्री बेन्जामिन नेतान्याहुले इरानी आक्रमणबाट १० जना इजरायलीको मृत्यु भएको दाबी गरेका छन् । उनले आफ्नो देशको आक्रमणको मुख्य लक्ष्य इरानलाई आणविक हतियार बनाउनबाट रोक्नु रहेको स्पष्ट पारेका छन् ।
यो द्वन्द्वको सुरुवात शुक्रबार इजरायलले इरानको आणविक केन्द्र, सैन्य संरचना र मानव बस्तीमा समेत हवाई आक्रमण गरेपछि भएको थियो । त्यसको जवाफमा इरानले शनिबारदेखि इजरायलमाथि ब्यालिस्टिक मिसाइल प्रहार गर्न थालेको हो ।
द्वन्द्व उत्कर्षमा पुगेसँगै अन्तर्राष्ट्रिय समुदायले शान्तिका लागि अपिल गर्न थालेको छ । क्यानडामा आयोजित जी-७ बैठक सकेर फर्कने क्रममा अमेरिकी राष्ट्रपति डोनाल्ड ट्रम्पले दुवै पक्षलाई तत्काल युद्धविरामका लागि आह्वान गरेका छन् ।
तर, इरानले भने आक्रमण जारी रहेको अवस्थामा वार्ता असम्भव रहेको अडान लिएको छ । इरानले आफ्नो यो सन्देश कतार र ओमानका मध्यस्थकर्तामार्फत अन्तर्राष्ट्रिय समुदायलाई दिएको रोयटर्सले जनाएको छ ।
युद्धको प्रत्यक्ष असर विश्व अर्थतन्त्रमा देखिन थालेको छ । सोमबार विश्व बजारमा कच्चा तेलको मूल्यमा उल्लेख्य वृद्धि भएको छ, जसले विश्वव्यापी महँगी बढ्ने संकेत गरेको छ ।
