गोकुलगंगा संवाददाता,
जन सहभागितामार्फत स्थानीय शासन सुदृढीकरणको पहल

काठमाडौँ,। २०८२ जेठ २४ – गोकुलगंगा गाउँपालिकाले आगामी आर्थिक वर्ष २०८२/८३ काे नीति तथा कार्यक्रम र बजेट निर्माण प्रक्रियालाई सहभागी, पारदर्शी र आवश्यकतामुखी बनाउन सुझाव संकलन तथा अन्तरक्रिया कार्यक्रम शनिबार बानेश्वर क्याम्पस, काठमाडौं मा सम्पन्न गरेको छ।

कार्यक्रमको सभापतित्व गाउँपालिका अध्यक्षज्यूले गर्नु भएको थियो भने नेपाल सरकारका ऊर्जा तथा जलस्रोत राज्यमन्त्री माननीय पूर्णबहादुर तामाङ (कान्छाराम) प्रमुख अतिथिका रूपमा उपस्थित हुनु भयो।

विशेष अतिथिका रूपमा संविधान सभा सदस्य आङ टावा शेर्पा, बागमती प्रदेशका पूर्व मन्त्री शान्ति प्रसाद पौडेल, तथा बानेश्वर क्याम्पसका प्रमुख घमान सिंह खड्का (डी.बी. बस्नेत) रहनु भएको थियो।

गोकुलगंगा गाउँपालिकाकी उपाध्यक्ष उषा देवी कार्की, प्रमुख प्रशासकीय अधिकृत दिनेश भट्टराई, लेखा अधिकृत विनोद राज खनाल, रोजगार संयोजक रामकुमार कार्की तथा देवराज कार्की लगायतका कर्मचारी, पूर्व सचिव, उपसचिव, अधिवक्ता प्रकाश बस्नेत, जन आवाज मिडिया हब प्रालिका अध्यक्ष नेत्र बहादुर कार्की, लगायतका बौद्धिक, राजनीतिक तथा नागरिक समाजका प्रतिनिधिहरू र सयौं गोकुलगंगा बासिन्दाहरूको उल्लेखनीय उपस्थिति रहेको थियो।

कार्यक्रमको उद्देश्य र महत्व

कार्यक्रमको मूल उद्देश्य स्थानीय तहको नीति तथा बजेट निर्माणमा नागरिकको प्रत्यक्ष सहभागिता सुनिश्चित गर्नु थियो। ‘शिक्षा, स्वास्थ्य, कृषि, पूर्वाधार र रोजगारी’ क्षेत्रमा केन्द्रित सुझावहरू संकलन गरिएका थिए। सहभागीहरूले आ–आफ्ना क्षेत्रका बास्तविक समस्याहरू, आवश्यकताहरू र समाधानका उपायहरू प्रस्तुत गरे।

राज्यमन्त्री तामाङले गोकुलगंगा गाउँपालिकाको यस्तो सहभागीमूलक अभ्यास अन्य पालिकाहरूका लागि आदर्श हुने बताए। उहाँले स्थानीय तहको बजेट योजनामा समावेशिता, जवाफदेहिता र दीर्घकालीन सोच आवश्यक रहेकोमा जोड दिनुभयो।

पूर्व मन्त्री शान्ति प्रसाद पौडेलले केन्द्र र प्रदेश सरकारबीच नीति समन्वय आवश्यक भएको उल्लेख गर्दै गाउँपालिकाको समग्र विकासका लागि संघीय सहयोग महत्वपूर्ण भएको बताउनुभयो।

कार्यक्रममा स्वागत मन्तव्य राख्दै गाउँपालिका उपाध्यक्ष उषा देवी कार्कीले गोकुलगंगा गाउँपालिका आफ्नो भौगोलिक दुर्गमता, सीमित स्रोतसाधनका बाबजुद शिक्षा, स्वास्थ्य, कृषि र पूर्वाधार क्षेत्रमा सुधार गर्न निरन्तर क्रियाशील रहेको बताउनु भयो। उनले आगामी वर्षको नीति तथा कार्यक्रम तयार पार्न जनस्तरबाटै सुझाव लिने पहललाई ऐतिहासिक भनेकी थिइन्।

पालिका अध्यक्षको धारणा

गोकुलगंगा गाउँपालिका अध्यक्षज्यूले कार्यक्रमको समापन गर्दै सहभागी सबैप्रति आभार व्यक्त गर्दै भन्नुभयो,

“जनप्रतिनिधिको भूमिकालाई जनताको विश्वासले बल पुर्‍याउँछ। यस कार्यक्रमबाट प्राप्त सुझावहरू आगामी नीति तथा बजेट निर्माणमा समावेश गर्दै गाउँपालिकालाई अझ सशक्त बनाउने छौं।“कार्यक्रमको समापनमा गाउँपालिकाका अध्यक्षले सहभागी सबैप्रति आभार प्रकट गर्दै सुझावहरूलाई गम्भीरतापूर्वक संकलन गरी भावी नीति तथा बजेटमा समावेश गरिने प्रतिबद्धता जनाउनुभयो। उहाँले भन्नुभयो, “हामी तपाईंहरूकै गाउँपालिका हो। यो पालिकाको भविष्य तपाईंहरूको सुझाव र सहयोगले निर्माण हुन्छ।”
कार्यक्रमले पालिका र प्रवासमा रहेका नागरिकबीचको सम्बन्धलाई बलियो बनाएको छ भने भावी योजनाहरूलाई जनभावनासँग जोड्ने कार्यमा सकारात्मक संकेत दिएको छ।

सारांश

सार्वजनिक सहभागिता, पारदर्शी योजना निर्माण प्रक्रिया र सामूहिक सहकार्यका दृष्टिकोणबाट यो कार्यक्रम स्थानीय शासनको नमूना अभ्यास बन्न पुगेको सहभागीहरूको प्रतिक्रिया थियो। कार्यक्रम विषयवस्तुमा आधारित, संघीय र स्थानीय तहबीच समन्वित सोच विकास गर्न सघाउ पुर्‍याउने गुणस्तरीय बहस र छलफलले भरिपूर्ण रह्यो।

📍 स्थान: बानेश्वर क्याम्पस, शान्तिनगर, काठमाडौं
🕚 मिति: २०८२/०२/२४, शनिबार, बिहान ११:०० बजे
🎤 रिपोर्टिङ: जन आवाज मिडिया हब
✍️ सम्पादन: जन आवाज टेलिभिजन समाचार डेस्क