काठमाडौं । हाल देशभरको मौसममा पश्चिमी वायु, स्थानीय वायु र बङ्गालको खाडी तथा अरब सागरबाट आएको जलवाष्पयुक्त हावाको प्रभाव देखिएको छ । मौसम पूर्वानुमान महाशाखाका अनुसार यस प्रभावका कारण विभिन्न प्रदेशहरूमा मौसम बदली भइरहेकाे छ भने कतिपय स्थानमा चट्याङसहित वर्षा समेत भइरहेको छ ।
कोशी, मधेस र बागमती प्रदेशलगायतका पहाडी भूभागमा आंशिकदेखि सामान्य बदली रहँदा बाँकी क्षेत्रको मौसम आंशिक बदलीदेखि सामान्यतया सफा रहेको महाशाखाले जनाएको छ । विशेष गरी बागमती प्रदेशका केही स्थानहरूमा तथा कोशी, मधेस, गण्डकी र कर्णाली प्रदेशका एक-दुई स्थानहरूमा चट्याङसहित हल्कादेखि मध्यम वर्षा भइरहेको छ ।
यसैबीच, बङ्गालको खाडीको उत्तर पश्चिम र दक्षिण पश्चिम क्षेत्रहरूमा तथा माल्दिभ्स र श्रीलङ्कासम्म मनसुन प्रवेश गरिसकेको छ । बङ्गालको खाडीबाट जमिनतर्फ मनसुनको प्रवाह अगाडि बढिरहेको अवस्थामा नेपालमा पनि आगामी दिनमा मनसुन सक्रिय हुने संकेत देखिएको छ ।
दिउँसो सातै प्रदेशमा आंशिकदेखि सामान्य बदली रहने र एक-दुई स्थानहरूमा चट्याङसहित हल्कादेखि मध्यम वर्षा हुन सक्ने सम्भावना रहेको महाशाखाले जनाएको छ । हिमाली भेगका एक-दुई स्थानहरूमा हल्का वर्षासहित हिमपात पनि हुनसक्ने पूर्वानुमान गरिएको छ। यो अवस्था रातिसम्म पनि कायम रहने छ ।
मौसमी अवस्थाको कारण दैनिक जनजीवन, कृषि, स्वास्थ्य, सडक यातायात तथा हवाई उडानहरू प्रभावित हुनसक्ने भएकाले सतर्कता अपनाउन मौसम पूर्वानुमान महाशाखाले आम सर्वसाधारणलाई आग्रह गरेको छ । यात्राका योजना बनाउँदा मौसमको अवस्थाबारे जानकारी लिई आवश्यक सावधानी अपनाउन समेत महाशाखाले सुझाव दिएको छ ।
