काठमाडौं । पूर्वमेयर पीएल सिंहको निधनमा काठमाडौँ महानगरपालिकाले आज सार्वजनिक बिदा दिएको छ । सोमबार बिहान जारी गरिएको विज्ञप्तिमा महानगरपालिकाले सिंहको असामयिक निधनप्रति गहिरो दुःख व्यक्त गर्दै महानगरका सम्पूर्ण कार्यालयहरूमा शोक बिदा दिने घोषणा गरेको हो ।
विज्ञप्तिमा उल्लेख गरिएको छ, ‘काठमाडौँ नगरपालिकालाई संवत् २०५२ मंसिर २९ गते महानगरपालिकाको रूपमा घोषणा गर्न नेतृत्व गर्नुभएका पूर्वप्रमुख पीएल सिंहको आज बिहान निजी निवासमा निधन भएको छ। उहाँप्रति महानगर परिवार भावपूर्ण श्रद्धाञ्जली अर्पण गर्दछ ।
- काठमाडौँका पूर्वमेयर पीएल सिंहको निधन
काठमाडौंका पूर्व मेयर पीएल सिंहको निधन भएको छ । पूर्वमन्त्री समेत रहेका सिंहको ठमेलको चाक्सीबारीस्थित निवासमा आज बिहान निधन भएको हो ।
उनी २०४९ सालको स्थानीय तह निर्वाचन जितेर सिंह तत्कालीन काठमाडौं नगरपालिकाको मेयर बनेका थिए । ८५ वर्षीय सिंह लामो समयदेखि अस्वस्थ थिए । गत वर्ष उनको पेटको शल्यक्रिया गरिएको थियो । उनले लौहपुरुष गणेशमान सिंहका प्रमुख सहयोगी भएर पनि काम गरेका थिए ।
तर कांग्रेसको राजनीतिबाट वितृष्णा जागेपछि उनी निष्कृय थिए । उनी पछिल्लो समय गणेशमान सिंहका छोरा एवम् वर्तमान उपप्रधानमन्त्री तथा शहरी विकास मन्त्री प्रकाशमान सिंहको निवासमा बस्दै आएका थिए । उनको निधन प्रकाशमान निवासमै भएको हो ।
सिंहले प्रमुखका रूपमा महानगरपालिकामा गरेका योगदान र समाज सेवामा देखाएको सक्रियतालाई उच्च सम्मान गर्दै आज (२०७८ पुस १ गते) अत्यावश्यक सेवाबाहेक महानगरका सबै कार्यालयहरू बन्द रहने जानकारी गराइएको छ ।
