काठमाडौं । सहकारी संस्था ठगि प्रकरणमा पक्राउ परेका राष्ट्रिय स्वतन्त्र पार्टी (रास्वपा)का सभापति रवि लामिछाने कास्की प्रहरीको हिरासतमा छन् ।
यही कार्तिक २ गते पार्टी कार्यालय बनस्थलीबाटै पक्राउ परेका उनी माथि अनुसन्धानका लागि १३ दिन म्याद थपिएको छ । यसैबीच सोमबार पार्टीको बैठक प्रहरी हिरासतमै बसेको छ ।
सो पार्टीका केन्द्रीय सदस्य ज्वाला सङ्ग्रौलाले हिरासत भित्र रास्वपा सभापति रवि लामिछानेसहित उपसभापतिहरू डीपी अर्याल,डा.स्वर्णिम वाग्ले,र कार्यवाहक प्रवक्ता मनिष झाको बैठक बसेको बताइन् ।
उनले सामाजिक सञ्जाल फेसबुकमार्फत हिरासत भित्रै पार्टीको वैठक बसेको बताएकी हुन् । उनले पोष्ट गरेको भिडिओमा भनेकी छन्,‘आधा घण्टा हिरासतमा पार्टीको बैठक बसेको छ ।’
पार्टीका कार्यवाहक प्रवक्ता मनिष झाले पार्टी सभापतिसंग आन्तरिक छलफल गरिएको बताए । उनले बुधवार पत्रकार सम्मेलन गरेर आगामी आन्दोलनको बारेमा जानकारी दिइने समेत बताए । त्यसक्रममा आगामी राजनीतिक कदमबारे समेत जानकारी दिइने उनले बताए ।
रास्वपा उपसभापति डीपि अर्याालले भने प्रहरी हिरासतभित्र पार्टीको बैठक नबसेको बताए । सर्वसाधारणकै रुपमा आफुहरु सभापतिलाई भेट्न गएको उनले बताए ।
उनले आफुहरुका लागि कार्यवाहक सभापति गौण कुरा रहेको बताए । दोस्रो चरणको आन्दोलनबारे पर्सीको पत्रकार सम्मेलनमा जानकारी दिइने उनले बताए ।
अर्का उपसभापति डा.स्वर्णिम वाग्लेले राजनीतिक प्रतिशोध साँध्न पार्टी सभापतिलाई अनावश्यक हिरासतमा राखिएको बताए । उनले न्यायिक अनुसन्धानको आफुहरुले कहिल्यै विरोध नगरेको बताए ।
