काठमाडौं । नेपाली कांग्रेसको केन्द्रीय समितिको बैठक आज बस्दैछ । भदौ ११ गते बस्ने भनिएको बैठक आज दिउँसो २ बजेपछि बस्ने गरी बोलाइएको छ ।
महामन्त्रीद्वय गगनकुमार थापा र विश्व प्रकाश शर्माले पेश गरेको प्रस्तावले पार्टीमा हलचल ल्याएपछि सहमति खोज्न बैठक सारिएको थियो । पार्टीको महासमिति बैठकमा महामन्त्री गगनकुमार थापाले आगामी निर्वाचन देखि कसैसँग पनि गठबन्धन गर्न नहुने र अर्का महामन्त्री विश्वप्रकाश शर्माले नेताहरू एक पटक राष्ट्रपति, दुई पटक प्रधानमन्त्री, तीन पटक मन्त्री र चार पटक भन्दा बढी सांसद बन्न नपाउने प्रस्ताव अगाडि सारेको विषय अहिले नेपाली कांग्रेसमा विवादित बनि रहेको छ ।
प्रस्ताव परिमार्जनका लागि सभापति शेर बहादुर देउवा आफै सक्रिय बनेका थिए । तीन पटक महामन्त्रीद्वयसँग छलफल भएको थियो । पछिल्लो पटक शनिबारमात्रै बुढानीलकण्ठमा पार्टीका पूर्व तथा वर्तमान पदाधिकारीहरुबीच भएको छलफलमा महामन्त्रीद्वयका प्रस्तावमा सहमति भएको बताइएको छ । अहिले दुवै प्रस्तावमा परिमार्जन सहित पारित गर्ने सहमति भएको एक नेताले जन प्रहारलाई जानकारी दिएका छन् ।
