काठमाडौं । पछिल्लो चौबिस घण्टामा चितवन, पाल्पा र सिन्धुपाल्चोकमा अति भारी वर्षा मापन भएको छ । चितवनको गोविन्दवस्ती, पाल्पाको बल्ड्याङगढी र सिन्धुपाल्चोकको ढुंगेमा अति भारी वर्षा मापन भएको हो ।
पछिल्लो चौबिस घण्टामा गोविन्दवस्तीमा २१८ मिलिमिटर, पाल्पाको बल्ड्याङगढीमा १२८.६ मिलिमिटर र सिन्धुपाल्चोकको ढुंगेमा ११४ र गोब्रेमा १११ मिलिमिटर वर्षा भएको छ । त्यसबाहेक थुप्रै स्थानमा भारी वर्षा मापन भएको छ ।
भारी वर्षाका कारण मेलम्ची नदी नाकोटेको जलमापन केन्द्रमा हालको जलसतहले सतर्कता तह पार गरेको छ । नदीको तल्लो तटीय क्षेत्रमा बाढीको जोखिम रहेकाले दिउँसोसम्म उच्च सतर्कता अपनाउन विभागको आग्रह छ ।
सिन्धुपाल्चोकको मेलम्ची घ्याङ, तार्के घ्याङ, बोल्दे, ढुंगे, भोटाङ, मानेखर्क, धाप, बाँसखर्क, दुवाचौर, गोब्रे, नवलपुर, बाउनेपाटी वर्षामापन केन्द्र र आसपासका क्षेत्रमा मध्यमदेखि भारी वर्षा भएको छ । उक्त क्षेत्र भएर बग्ने स-साना नदीहरूमा आकस्मिक बाढीको जोखिम रहेको छ ।
कमजोर तथा भिरालो जमिनमा पहिरोको जोखिम भएको भन्दै विभागले तटीय क्षेत्रमा हुनेहरूलाई दिउँसोसम्म सतर्कता अपनाउन विभागले सचेत गराएको छ ।
