काठमाडौं । नेकपा एमालेका अध्यक्ष केपी शर्मा ओलीले गृहमन्त्री नारायणकाजी श्रेष्ठ सुन तस्करी प्रकरणलाई ढाकछोप गर्न लागेको आरोप लगाएका छन् ।
मंगलवार प्रतिनिधि सभाको बैठकमा बोल्दै अध्यक्ष ओलीले गृहमन्त्री श्रेष्ठले सुन तस्करी प्रकरणलाई ढाकछोप गर्न लागेको बताए ।
उनले भेपमा तस्करी भएको ९ किलो सुन र अर्को १०० किलो सुन तस्करी प्रकरणलाई गृहमन्त्रीले ढाकछोप गर्न लागेको बताए ।
उनले गृहमन्त्रीले छानबिन आयोग समेत बनाउन नचाहेर स्वतन्त्र र निष्पक्ष छानविन सँग डराएको आरोप लगाए ।
सरकारले सुशासनको अभियान सुरु गरेको बताउने गरेको भन्दै सुशासन कायम गर्नु सरकारको नियमित कर्तव्य भएको बताए ।
उनले भने – “गृहमन्त्रीजीले हेटौँडामा गएर उधुम नै खोक्नुभयो । सुशासनको अभियान चलाएको त्यसलाई रोक्न संगठित रुपमा विरोधीहरु लागेका छन् । कुन विरोधी लागे तपाईको सुशासन रोक्न ? साडे ९ किलो सुन भेपमा पक्राउ पर्छ तपाई ढाकछोप गर्न लाग्नुुहुन्छ । १०० किलो सुन पक्राउ पर्छ, ढाकछोप गर्न लाग्नुहुन्छ । छानविन गर्न आयोग बनाउ न भन्दा एक महिनासम्म लडाइँ गर्नुपर्छ ।
छानविन गर्दा के बिग्रिन्थ्यो महाशय तपाईको ? किन आत्तिनुभएको स्वतन्त्र, निष्पक्ष छानविनसँग ? गफ दिनुहुन्छ हेटौँडा गएर ? सुशासनको अभियान । सुशासन सरकारले निरन्तर कायम गर्ने हो कि अभियान हो सुशासन ? सुशासन अभियान हो ? सुशासन भनेको सरकारको नियमित कर्तव्य हो । नियमित काम हो । सरकारले शान्ति, सुरक्षा दिनुपर्छ । भ्रष्टाचार रोक्नुपर्छ । कमिशनतन्त्र रोक्नुपर्छ । घुस रोक्नुपर्छ ।
प्रतिपक्षले सुशासनको अभियान चलाउन दिएन संगठित रुपले विरोध गर्यो भनेर । म प्रश्न गर्न चाहान्छु, एयरपोर्टमा किन पक्राउ परेन सुन ? सुन आएको आएकै छ तर आवश्यक परेका बेला हाजिर हुनेछ भन्ने कागज गराएर मान्छे भगाउ, सामान लुकाउ, छिटो गर, जाउ भनेर पठाइयो । सुनिल शर्मा निर्वाचित जनप्रतिनिधिको सर्टिफिकेटमा शंका लाग्यो भनेर थुनामा राखियो । एक क्विन्टल सुन तस्करी गरेको मान्छेलाई पु¥याउने बित्तिकै थपक्कै छोडियो किन ? म गृहमन्त्री ज्यूलाई सोध्न चाहान्छु के यही हो अभियान ? सुशासनको अभियान भनेको यही हो ? राजनीतिको अपराधीकरणतर्फ मोडिएको छ ।’
उनले सरकार चरम अनुत्तरदायी र गैर जिम्मेवार भएको बताए । सरकारले संविधान दिवसको अवसर पारेर मुस्कान खातुनलाई एसिड हान्ने व्यक्तिको कैद मिनाहा गरेको भन्दै आपत्ति जनाए ।
त्यस्तै नेपालगञ्जमा हत्या अभियोगमा कारागारमा परेका रिगल डन भनिने योगराज ढकाललाई पनि उन्मुक्ति दिएको प्रति ओलीले आपत्ति जनाए ।
सरकारले सांसदहरुलाई विभिन्न बहानामा तर्साउन खोजिरहेको उनको भनाई छ । अध्यक्ष ओलीले सरकारले राष्ट्रिय स्वाभिमान र गौरव बिरोधी, संविधान बिरोधी, राष्ट्रहीत र जनबिरोधी काम गरिरहेको पनि बताए ।
