काठमाडौं । भारतको उत्तराखण्डस्थित केदारनाथ प्रवेश गर्ने मुख्य बिन्दुमा पर्ने गौरीकुण्डमा गएको पहिरोमा परी हराईरहेका १६ जना नेपालीको अवस्था अझैपनि अज्ञात छ ।
बिहीबार रातिबाट परेको वर्षासँगै खसेको पहिरोमा नेपालका १६ तथा भारतका ३ जना बेपत्ता भएका हुन् । पहिरोमा पुरिएका ३ जनाको शब शनिबार निकालिएको छ । तर, उनीहरु नेपाली हुन् कि भारतीय भन्ने सनाखत हुन भने सकेको छैन ।
पहिरोमा पुरिएकाहरुमा जुम्लाको पातारासी गाउँपाकिला ३ चौरगाउँका ३० वर्षीय अमर बोहोरा, उनकी पत्नी २९ वर्षीया अनिता बोहोरा, छोरीहरु सलिता बोहोरा, पिंकी बोहोरा, प्रीती बोहोरा, छोराहरु जटिल बोहोरा र वकिल बोहोरा रहेका छन् ।
यसैगरि सोही गाउँका ४६ वर्षीय सुकराम रावत र ३८ वर्षीय बम बोहोरा, पातारासी गाउापालिका २ पेरेगाउँका ५५ वर्षीय धर्मराज बुढा र २४ वर्षीय चन्न कामी पनि वेपत्ता भएका छन् । पहिरोमा पुरिएर कालिकोटका ५ जना वेपत्ता भएको बताईएको छ ।
उत्तराखण्डको रुद्रप्रयाग जिल्लामा नेपालीहरुले सञ्चालन गर्दै आएका तीनवटा होटेल पहिरोले बगाएको छ ।
