काठमाडौँ । राष्ट्रिय स्वतन्त्र पार्टी (रास्वपा)की सांसद डा. तोसिमा कार्कीले सो प्रकरणमा देशका ठूल्ठूला निकाय र राजनेताहरु नै संलग्न रहेको भन्दै छानविन गरी दोषीलाई कारवाही गर्नुपर्ने बताएकी छन् । प्रतिनिधि सभा संसदको बुधबारको बैठकको शून्य समयमा बोल्दै उनले यस्तो बताएकी हुन् ।
मंगलबारको प्रतिनिधि सभा बैठकमा बोल्दै आफू महिला भएकै कारण भ्रष्टाचारको आरोप लगाएको भन्ने सांसद आरजु देउवाको भनाइलाई लक्षित गर्दै सांसद कार्कीले भ्रष्टाचारले लिंगसँग सम्बन्ध नराख्ने बताइन् ।
‘एक माननीयले भन्नु भयो महिला भएकै कारण भ्रष्टाचारको आरोप लाग्यो,’ उनले भनिन्, ‘भ्रष्टाचारसँग लिंग कहाँ जोडिन्छ ।’
उनले सबै सांसदहरुको सम्पत्ति संसद सचिवालयको वेबसाइटमा तत्काल सार्वजनिक गरि उनीहरुको सम्पत्तिको स्रोत खोज्न पनि सभामुखलाई निर्देशन दिनुपर्ने माग गरिन् ।
सांसद कार्कीले भन्नु भयो, ‘प्रश्न छ–यो सदन देश निर्माण गर्न छलफल गर्ने ठाउँ हो कि एक भ्रष्टाचारीले अर्को भ्रष्टाचारीलाई जोगाउने प्रहशन स्थल हो ? नेपाली नागरिकलाई भुटानी शरणार्थी बनाएर विदेश लैजाने काममा देशका ठूलाठूला निकाय र राजनेताहरु संलग्न भएको कुरा बाहिर आइरहेको छ ।
प्रहरीद्धारा पक्राउ पूर्जी जारी गर्दासमेत जोगाउन खोजिएको छ । एकले अर्कालाई जोगाईरहने, काण्डैकाण्ड गरिरहने अनि देश डुबाईरहने ? अन्तराष्ट्रिय जगतमा राष्ट्रलाई नै, राज्यलाई नै दलाल स्थापित गराउने अनि के मुखले अनुदान माग्न जाने ? सबै सांसदहरुको सम्पत्ति वेबसाईटमार्फत सार्वजनिक गरियोस् । करसहितको स्रोत खोज्न पनि निर्देशन दिइयोस् ।
