काठमाडौं । प्रधानमन्त्री पुष्पकमल दाहाल (प्रचण्ड) राष्ट्रिय स्वतन्त्र पार्टी (रास्वपा)लाई सरकारमा फर्काउने कोसिस गरिरहेका छन् । उपनिर्वाचनमा गठबन्धनका उम्मेदवारलाई हराउँदै चितवन २ र तनहुँ १ मा रास्वपाले सानदार जीत निकालेसँगै प्रधानमन्त्री दाहाल रास्वपालाई सरकारमा फर्काउने कसरतमा देखिएका छन् ।
बालुवाटार स्रोतका अनुसार रास्वपालाई सरकारमा सहभागी गराउने विषयमा प्रधानमन्त्री र रास्वपाका पार्टी सभापति रवि लामिछानेबीच टेलिफोन संवादसमेत भएको छ । ‘रविजीले चितवनबाट जितेसँगै प्रधानमन्त्री ज्युले उहाँलाई टेलिफोन गर्नुभएको थियो । संवादका क्रममा रास्वपाले सरकारलाई दिएको समर्थन फिर्ता लिने वा नलिने विषयमा छलफल भएको थियो ।’, टेलिफोन संवादमै रविजीले समर्थन फिर्ता नलिने भन्नुभएको छ । सरकारमा सहभागी हुने बारेमा कुराकानी चलिरहेको छ ।
यता राष्ट्रिय स्वतन्त्र पार्टी रास्वपाले भने सरकारमा सहभागी हुनका लागि मुख्यतया तीन सर्त अघि सारेको छ । पहिलो सरकारको निरन्तरता, दोस्रो साझा न्यूनतम कार्यक्रम पुनर्लेखन र तेस्रो पुरानै मन्त्रालय ।
रास्वपाका एक नेताका अनुसार यदी सरकार दुई वर्षका लागि स्थिर रहने ग्यारेन्टी भएको अवस्थामा रास्वपा सरकारमा जानेछ । ‘अस्थिर सरकारमा सहभागी हुनुको कुनै औचित्य हुँदैन, हामी सरकारमा जाने सरकार नटिक्ने भयो भने राम्रो हुँदैन । हामी सरकारमा काम गर्न जाने हो, काम गर्नका लागि सरकार स्थिर हुनुपर्छ ।’, उनले भने, ‘अर्को कुरा भनेको सरकारले यसअघि साझा न्यूनतम कार्यक्रममा हाम्रा विषय समेटिएको भए पनि अहिले हटेको छ । हामी सरकारमा सहभागी हुनका लागि सझा न्यूनतम कार्यक्रम पूनर्लेखन हुनुपर्छ र हाम्रा विषय समेटिनुपर्छ ।’
त्यस्तै, रास्वपाले पुरानै मन्त्रालय पाए सरकारमा सहभागी हुने सम्भावना रहने ती नेताले बताएका छन् । रास्वपाले सरकारबाट बाहिरिनुअघि उपप्रधानसहित गृह, शिक्षा र श्रम तथा रोजगार मन्त्रालय लिएको थियो । रास्वपा सरकारबाट बाहिरिएपछि हाल गृह माओवादी, शिक्षा जसपा र श्रम मन्त्रालय लोसपाले लिएको छ ।
