काठमाडौँ । चितवन २ मा रवि लामिछानेले फराकिलो मतान्तरले विजयी भएका छन् । अन्तिम मत परिणाम अनुसार रविले ५४ हजार १ सय ७५ मत ल्याएर विजयी भएका छन् ।
उनले गठबन्धनका साझा उम्मेदवार नेपाली कांग्रेसका जितनारायण श्रेष्ठ भन्दा ४२ हजार ९ सय ६२ मत बढी ल्याएका छन् । श्रेष्ठको मत ११ हजार २ सय १४ छ ।
त्यस्तै, तेस्रो स्थानमा एमालेका रामप्रसाद न्यौपानेले १० हजार ९ सय ३६ मत ल्याएका छन् । चितवनमा जम्मा ७८ हजार ४ सय ६६ मत खसेको थियो ।
‘निर्वाचनको अन्तिम मत परिणाम आइनसके पनि ५४ हजार भन्दा बढी मतले हाम्रो उम्मेदवार विजयी हुनु भएको भन्ने कुरा छ,’ रास्वपा उपसभापति डोलप्रसाद अर्यालले भने, ‘सम्भवतः नेपालमा अत्यधिक मतान्तर र मतले विजयी हुने हालसम्मको उम्मेदवार हाम्रो सभापति नै हो ।’
रविको तीव्र वेग : ‘फर्स्ट एटेम्प्ट’ मै सांसददेखि उपप्रधानमन्त्रीसम्म
चितवन २ मा ४ मंसिरको प्रतिनिधि सभा निर्वाचनमा पाँच दलीय गठबन्धनले कांग्रेसका उमेश श्रेष्ठलाई उम्मेदवार बनाएको थियो । नेकपा एमालेले कृष्णभक्त पोखरेललाई उठाएको थियो । राष्ट्रिय स्वतन्त्र पार्टीका तर्फबाट पार्टी सभापति लामिछाने नै उठेका थिए ।
उक्त निर्वाचनमा ८३ हजार ९५६ जनाले मतदान गरेको निर्वाचन आयोगको तथ्याङ्कमा छ ।
त्यतिबेला लामिछानेले ४९ हजार २६४ मत पाएका थिए । उनका निकटतम प्रतिद्वन्द्वी नेपाली कांग्रेसका श्रेष्ठले १४ हजार ९८३ मत प्राप्त गरेका थिए । नेकपा एमालेका पोखरेलले १४ हजार ६६७ मत पाएका थिए ।
उक्त निर्वाचनमा पनि निकटतम प्रतिद्वन्द्वी नेपाली कांग्रेसका उमेश श्रेष्ठले भन्दा ३४ हजार २८१ भोट बढी पाएका लामिछानेले पाएर देशमै फराकिलो मतान्तरले विजय भएका थिए ।
अहिले भने रविले ४ मंसिरमा बनाएकाे आफ्नै रेकर्ड ताेडेर नयाँ रेकर्ड बनाएका हुन् ।
