काठमाडौं । चितवन-२को उपनिर्वाचनमा इच्छाकामना गाउँपालिकाको मतगणना सकिँदा राष्ट्रिय स्वतन्त्र पार्टीका उम्मेदवार रवि लामिछानेले अग्रता कायमै राखेका छन्। पछिल्लो मत परिणामअनुसार रवि लामिछाने अन्य प्रतिस्पर्धीभन्दा १७ सय मतले अघि छन्।
रविले ४ हजार ३५८ मत पाएका छन्। उनका प्रतिस्पर्धी नेकपा एमालेका उम्मेदवार रामप्रसाद न्यौपानेले २ हजार ५८५ मत र नेपाली कांग्रेसका जितनारायण श्रेष्ठले २ हजार २०५ मत पाएका छन्।
अहिले इच्छाकामना गाउँपालिकाका सबै वडाबाट ९ हजार ४४४ मतगणना सकिएको हो।
यस पालिकामा गत मंसिरमा भएको निर्वाचनमा रवि लामिछाने तेस्रो भएका थिए। तर यसपालि उनले अन्य प्रतिस्पर्धीले भन्दा धेरै मत ल्याएका छन्।
मंसिरमा सबैभन्दा बढी मत नेकपा एमालेले ल्याएको थियो। यहाँ नेकपा एमालेले ३ हजार ६२३ मत पाएको थियो।
नेपाली कांग्रेसले ३ हजार २१६ मत पाएको थियो। यस्तै राष्ट्रिय स्वतन्त्र पार्टी रास्वपाले भने २ हजार ९७५ मत पाएको थियो।
मतगणना जारी छ। भरतपुर महानगरपालिकाको वडा नम्बर १ र २ को मतगणना सुरू भएको हो।
