काठमाडौं । नेकपा एकीकृत समाजवादीले वैशाख ९ गते देशभर विभिन्न कार्यक्रम गरेर कम्युनिष्ट पार्टी स्थापना दिवस मनाउने भएको छ ।
आज शुक्रबार बसेको नेकपा एकीकृत समाजवादीको बैठकले अप्रिल २२ को दिन कम्युनिष्ट पार्टी स्थापना भएकोले त्यो दिन पारेर वैशाख ९ गते स्थापना दिवस मनाउने निर्णय गरेको हो ।
नेकपा एकीकृत समाजवादीका प्रवक्ता जगन्नाथ खतिवडाका अनुसार स्थापना दिवसका अवसरमा काठमाडौंमा एउटा केन्द्रीय कार्यक्रम हुने जिल्लाहरुमा आफू अनुकुल कार्यक्रम हुने छन् ।
बैठकले नेकपा एकीकृत समाजवादी छाडेका नेता मुकुन्द न्यौपानेको नाम अभिलेखबाट हटाउने निर्णय गरेको समेत जानकारी खतिवडाले दिएका छन् ।
पार्टी दक्षिणपन्थीको सेवक मात्र बनेको र जति खाए पनि नभरिने नेताहरूको चरित्र देखिएको भन्दै नेता न्यौपानेले नेकपा एकीकृत समाजवादी छाडेको घोषणा गरेका थिए । उनले आफूले राखेको प्रस्तावमाथि पार्टीमा छलफल नगरेको आरोप लगाएका थिए ।
तर खतिवडाले न्यौपानेले लगाएका आरोप खण्डन गर्न लायक पनि नरहेको बताएका छन् ।
न्यौपानेले पार्टी स्थापनाको उद्देश्य विपरीतको प्रस्ताव राखेको भन्दै खतिवडाले त्यो प्रस्ताव गलत भएको र त्यो प्रस्तावमा उनी बाहेक अरु कसैले समर्थन नगरेका कारण पार्टीमा छलफल नभएको पनि बताएका छन् ।
