काठमाडौँ । उपप्रधानमन्त्री एवम् गृहमन्त्री नारायणकाजी श्रेष्ठले दुई करोड मागेको अडियोको बारेमा अनुसन्धान हुने बताएका छन् । प्रेस सेन्टर चितवनले बिहान आयोजना गरेको पत्रकार सम्मेलन उपप्रधानमन्त्री तथा गृहमन्त्री नारायण काजी श्रेष्ठले राष्ट्रिय स्वतन्त्र पार्टीका सांसद ढाकाकुमार श्रेष्ठले मेडिकल व्यवसायी दुर्गा प्रसाईँसँग दुई करोड रुपैयाँ मागेको अडियो प्रकरणको अनुसन्धान हुने बताएका हुन् ।
अनुसन्धानबाट जे पुष्टि हुन्छ, त्यहीअनुसार अघि बढ्ने उनको भनाइ रहेको छ । ‘दुई करोडको कुरा आएको छ । त्यसलाई आधिकारिक रूपमा अनुसन्धानको प्रक्रियाबाट हामी कोही निष्कर्षमा पुगिसकेका छैनौँ,’ उनले भने, ‘अनुसन्धानको प्रक्रिया अघि बढेपछि अनुसन्धानबाट जे पुष्टि हुन्छ त्यही अनुसार हामी अघि बढ्ने कुरा हुन्छ ।
उपप्रधानमन्त्री श्रेष्ठले नेपालको राजनीतिमा देखापरेका समस्या सच्चिनुपर्ने बताएका छन् । ‘भ्रष्टाचारका लागि कुनै पनि छुट हुन सक्दैन,’ उनले भने । प्रहरीको व्यवहार जनमुखी र सेवामुखी हुनुपर्ने भन्दै उनले महिला हिंसा नियन्त्रणका लागि सरकारले काम गर्ने बताएका छन् । उनले अगाडि भने, ‘नागरिकता पाउनुपर्ने संवैधानिक हक छ, तर कानुन नभएकाले पीडा भोगिरहेका छन् ।
