काठमाडौँ । नेपाली कांग्रेसका महामन्त्री गगनकुमार थापाले तनहुँ–१ कसैका लागि प्रयोग गर्ने ठाउँ नभएको बताएका छन् । नेपाली कांग्रेसका उम्मेदवार गोविन्द भट्टराईको उम्मेदवारी मनोनयन दर्तापछि कार्यक्रमलाई सम्बोधन गर्दै थापाले भने,तनहुँवासीले गत आम चुनावमा पाँच वर्ष जिम्मेवारी सुम्पिनु भएको नेपाली काँग्रेसका नेता अहिले राष्ट्रपति बन्नु भएको छ । यो ठाउँ कसैका लागि प्रयोग गर्ने ठाउँ होइन ।
नेपाली कांग्रेस छाडेर राष्ट्रिय स्वतन्त्र पार्टी रास्वपाबाट उम्मेदवार बनेका अर्थविद डा. स्वर्णिम वाग्लेप्रति लक्षित गर्दै महामन्त्री थापाले राष्ट्रपतिको उत्तराधिकार गोविन्द भट्टराई भएको बताएका छन् । विशेष परिस्थितिले भएको उपनिर्वाचनमा नेपाली कांग्रेसका उम्मेदवार जित्नुको विकल्प नभएको उनको भनाइ रहेको छ ।
‘गोविन्द भट्टराईबाट हामीले शालीनता सिक्ने हो । गोविन्द भट्टराई राजनीतिक आँखाले तनहुँमा खानेपानी र विद्यार्थीको समस्या देख्यो । उहाँ यो बाटोले चिनेको मान्छे । तनहुँवासीले संसदमा अब शंकर भण्डारीसँग गोविन्द भट्टराईलाई देख्ने महामन्त्री थापाले दाबी गरेका छन् ।
नेकपा माओवादी केन्द्र र नेकपा एकीकृत समाजवादी लगायतका नेता कार्यकर्तालाई पनि भट्टराईले न्याय गर्ने बताएका छन् । ‘गोविन्द भट्टराई, हराउने कराउने, डराउने मात्र सांसद बन्नु हुन्न । गोविन्द भट्टराईलाई जिताएर गलत गरेछु भन्ने हुँदैन,’ उनले भनेका छन् ।
