काठमाडौं । नेकपा एमालेले कर्णाली प्रदेशका मुख्यमन्त्री राजकुमार शर्मालाई विश्वासको मत दिने भएको छ ।
विश्वासको मत लिने मुख्यमन्त्री शर्माको प्रस्तावमाथि शुक्रबार धारणा राख्दै नेकपा एमाले संसदीय दलका नेता यामलाल कँडेलले विपक्षमा भोट हाल्ने सम्बन्ध र तहमा नरहेकाले मुख्यमन्त्रीलाई विश्वासको दिने बताएका छन् ।
सत्तापक्षको सिटमा बसेर विपक्षमा भोट हाल्न नमिल्ने भन्दै नेता कँडेलले भने, ‘सत्ता पक्षको कुर्सीमा बसेर विपक्षमा भोट हाल्न मिल्दैन । सरकारमा रहने या नरहने सरकारको नेतृत्व गरिरहेको पार्टीको भूमिकामा भर पर्छ ।
सरकार अप्ठेरामा परे विश्वासको मत दिने बताएका नेपाली कांग्रेस संसदीय दलका नेता जीवन बहादुर शाहीलाई लक्षित गर्दै कँडेलले भने, ‘भरिएर पोखिए पनि पोखिन्छ भनेर दिने भए दिए हुन्छ । तर हाम्रो समर्थन कायम नै छ । सरकार संकटमा छैन ।
प्रदेश सभामा कुनै पनि पार्टीले बहुमत प्राप्त नगरेकाले नेकपा एमाले नेकपा माओवादी केन्द्रसँग मिलेर २७ पुषको सहमति अनुसार पाँचै वर्षका लागि जान तयार रहेको समेत स्पष्ट पारेका छन् ।
‘हाम्रो लक्ष विकास र समृद्धि हो । कुर्सी हैन। स्थिर सरकारका र विकासका लागि नेकपा एमाले पुर्वसहमति अनुसार सत्तासाझेदार गर्न तयार छ,’ कँडेलले भने ।
