काठमाडौं । नेपाली कांग्रेसले सरकारमा पठाउने ८ जना मन्त्रीको नाम करिब टुंग्याएको छ । प्रधानमन्त्री पुष्पकमल दाहाल ‘प्रचण्ड’ले बुधबारसम्म मन्त्रिपरिषद विस्तार गर्न तयारी थालेपछि नेपाली कांग्रेसले पनि मन्त्रीको नाम करिब–करिब टुङ्गो लगाएको हो ।
नेपाली कांग्रेसका एक पदाधिकारीका अनुसार अर्थ,परराष्ट्र, रक्षा, स्वास्थ्य तथा जनसङ्ख्या, उद्योग वाणिज्य तथा आपूर्ति, कानून, न्याय तथा संसदीय मामिला मन्त्रालय, भूमि व्यवस्था सहकारी तथा गरिबी निवारण र बालबालिका तथा ज्येष्ठ नागरिक मन्त्रालय नेपाली कांग्रेसले पाउने सम्भावना बलियो छ । तर, सभापति शेर बहादुर देउवाले भौतिक पूर्वाधार तथा यातायात, सहरी विकास र ऊर्जा, जलस्रोत तथा सिँचाइ मन्त्रालयमध्ये एउटामा दाबी राखेका छन् ।
नेकपा माओवादी केन्द्रले गृह मन्त्रालय पाउने भएपछि शेर बहादुर देउवाको मुख्य ध्यान भौतिक पूर्वाधार तथा यातायात मन्त्रालयमा छ । केन्द्रीय कार्यसम्पादन समिति बैठक रोकेर सभापति देउवा मन्त्रीको टुङ्गो लगाउन जुटेका हुन् । उनले सोमबार महामन्त्रीद्वय गगनकुमार थापा र विश्वप्रकाश शर्मासँग छलफल गरेका थिए ।
यस्तै, उनले सोमबारै मन्त्रीको सूचीमा समेटिएकाहरुसँग पनि एक्ला एक्लै छलफल गरेका थिए । मंगलबार बिहान उपसभापति पूर्णबहादुर खड्का र प्रवक्ता डा.प्रकाशशरण महतसँग लामो संवाद गरेको धुम्बाराही स्रोतले बताएको छ ।
आठ मन्त्रालयमध्ये ६ वटामा आफ्नो समूहभित्रबाट मन्त्री बनाउने देउवाको तयारी रहेको बुझिएको छ । उपसभापति पूर्णबहादुर खड्काको नेतृत्वमा नेपाली कांग्रेस सरकारमा सहभागी हुनेछ । अर्थमन्त्रीमा डा. प्रकाशशरण महतलाई पठाउने देउवाको योजना रहेको छ ।
नेपाली कांग्रेसका एक पदाधिकारीका अनुसार अन्य मन्त्रीहरुमा एनपी साउद, रमेश रिजाल,सीता गुरुङ सभापति देउवाका पहिलो प्राथमिकतामा छन् । नेता प्रकाशमानसिंह र डा.शशांक कोइरालामध्येको सिफारिसमा एकजना मन्त्री बन्ने सम्भावना बलियो रहेको छ ।
नेता प्रकाशमान सिंहले राजन केसी र नेता डा.शशांक कोइरालाले दीपक खड्कालाई मन्त्री बनाउन चाहेको देखिन्छ । अर्थमन्त्री नपाउने भएपछि विनोद चौधरी र उदयशम्शेर राणाले परराष्ट्र मन्त्रीका लागि लबिङ थालेको देखिन्छ ।
यता बरिष्ठ नेता डा. शेखर कोइराला र महामन्त्री गगनकुमार थापा समूहलाई २ मन्त्रालय दिने मनस्थिति पार्टी सभापति शेर बहादुर देउवाको देखिएको छ । डा. शेखर कोइराला र महामन्त्री गगनकुमार थापा समुहको दाबी तीन मन्त्रालयमा रहेको बुझिएको छ । जसमा उपसभापति धनराज गुरुङ र नेता डिकबहादुर लिम्बूलाई मन्त्री बनाउने शेखरको तयारी छ । महामन्त्री गगनकुमार थापा र अर्का महामन्त्री विश्वप्रकाश शर्मा भने जीवन परियार, बद्री पाण्डे र प्रदीप पौडेलमध्ये एक जनालाई मन्त्री बनाउन चाहन्छन् ।
पार्टी सभापति शेर बहादुर देउवाले अहिलेसम्म एउटा मुड बनाएको देखिएपनि अन्य नेताहरूको पनि दबाब भने चर्को छ । सहमहामन्त्री किशोरसिंह राठौर, नेताहरू मोहन बस्नेत, शंकर भण्डारी, उदयशम्शेर राणा, श्याम घिमिरे, वीरबहादुर बलायरले पनि आ–आफ्नोतर्फबाट दबाब बढाएका छन् ।
