काठमाडौं । नयाँ राष्ट्रपति रामचन्द्र पौडेलको स्वागत, अनि निवर्तमान राष्ट्रपति विद्या भण्डारीको बिदाइका क्रममा पाँच रोचक दृश्य देखिए ।
दृश्य एक – शपथ ग्रहणमा त्रुटि
शपथको ब्यहोरा पढ्दापढ्दै कामु प्रधानन्यायाधीश हरिकृष्ण कार्कीभन्दा अघि अघि राष्ट्रपति पौडेलले लिखित ब्यहोरा बाचन गर्न थालेपछि एडिसीले रोकेको दृश्य देखियो ।
म संविधान र कानुनको अधीनमा रही भन्दैगर्दा राष्ट्रपति पौडेलले सबै व्यहोरा पढ्न थालेपछि एडिसीले रोकेका हुन् । दृश्यमा निवर्तमान राष्ट्रपति भण्डारीले पौडेललाई सम्झाएजस्तो देखिन्छ । त्यसपछि फेरि कार्कीले व्यहोरा पढ्छन्, अनि राष्ट्रपति पौडेलले दोहोर्याउँछन् ।
दृश्य दुई – कुर्सी साट्दा अलमल
शपथ ग्रहणपछि निवर्तमान राष्ट्रपति भण्डारी बसेको कुर्सीमा राष्ट्रपति पौडेललाई राख्ने, अनि पौडेलको कुर्सीमा भण्डारी राख्ने क्रममा उद्घोषक यादव कोइरालाले गड्बडी गर्छन् । उनले प्रधानमन्त्री, पार्टी प्रमुखहरु तथा कुटनीतिज्ञहरुको बधाई लिने कार्यसूची अघि बढाउँछन् । उनले कुर्सी साट्ने कार्यक्रमबारे जानकारी नगराएपछि विद्या भण्डारीले सम्झाएको भिडियो देख्न सकिन्छ । त्यसपछि यादव कोइराला बोल्न रोकिन्छन् । कुर्सी साटासाट हुन्छ ।
दृश्य तीन – भण्डारीलाई कारसम्म छाड्न गए पौडेल
निवर्तमान राष्ट्रपति भण्डारीले राष्ट्रपति पौडेललाई बधाई दिँदै हात मिलाउँछिन् । पौडेलले पहिले नमस्कार गर्छन् । अनि हात दिन्छन् । त्यसपछि भण्डारी सबैलाई बिदाइका हात हल्लाउँदै कारतिर बढ्छिन् । उनी पौडेलसँग बिदा माग्छिन् । तर पौडेलले केही बोलेको भान हुन्छ । सम्भवतः उनले कारसम्म म पनि जान्छु भनेको जस्तो संकेत मिल्छ । किनभने उनी त्यसपछि भण्डारीको पछिपछि कारसम्म जान्छन् । बिदाइ गरेर मन्चमा फर्कन्छन् ।
दृश्य चार – भण्डारी बसेको कुर्सीमा प्रथम महिला
संयोग नै भनौं, यसअघिका दुई राष्ट्रपति क्रमशः एकल पुरुष तथा एकल महिला थिए । तेस्रो राष्ट्रपति पौडेललाई पत्नी सविता पौडेललाई साथै लगेर शपथ ग्रहण गर्ने सुयोग जुर्यो । भण्डारी बिदाइ गरेर उनी मन्चमा फर्कदा प्रथम महिलाका रुपमा सवितालाई पौडेलको साथैमा राखियो । यो अन्तर्राष्ट्रिय रुपमा स्थापित सामान्य प्रचलन नै हो । नेपालमा भने गणतन्त्रपछि यो पहिलोपटक देखिएको दृश्य हो ।
दृश्य पाँच– अरुलाई नमस्कार, रामबरणलाई हात
बधाई ग्रहण क्रममा रामचन्द्रले छेउमा रहेका प्रधानमन्त्री पुष्पकमल दाहाल प्रचण्ड, काम प्रधानन्याधीश हरिकृष्ण कार्कीलगायतसँग हात मिलाएका थिए । तल्लो भागमा रहेको टेन्टमा रहेका कांग्रेस सभापति शेरबहादुर देउवा, एमाले अध्यक्ष केपी ओलीलगायत नेताहरुसँग भने उनले परैबाट हात हल्लाएर बधाई ग्रहण गरे । उनीहरुलाई राष्ट्रपति पौडेलले नमस्कार गरे । नेताहरुले पनि नमस्कार फर्काए ।
तिनै नेताहरुसँगै बसिरहेका प्रथम राष्ट्रपति रामवरण यादवसँग भने पौडेलले हात मिलाए ।
