काठमाडौँ । नेकपा एमालेले सञ्चालन गरेको ग्रास रुट कार्यक्रममा नेता कार्यकर्ताबीच तीव्र मतभेद देखिएको छ ।
नेकपा एमालेको ग्रास रुट कार्यक्रम जनजागरण भन्दा पनि नेताहरूका गुटगत भेलाको रूपमा परिणत भएको देखिएको हो । जहाँ नेता कार्यकर्तामा फुट देखिएको हो ।
शुक्रबार मात्रै अछामको साँफेबगरमा नेकपा एमालेका अध्यक्ष केपी शर्मा ओली समूह र पार्टीका प्रभाब शालि नेता डा.भीम बहादुर रावल निकट समूहले छुट्टाछुट्टै ग्रास रुट कार्यक्रम गरेको थियो । छुट्टाछुट्टै कार्यक्रम आयोजना गरिएपछि एक अर्काप्रति आरोप प्रत्यारोप समेत भएको थियो ।
एक पक्षले आयोजना गरेको ग्रास रुट कार्यक्रममा सहभागी नेकपा एमाले नेता डा.भीम बहादुर रावलले आफू हिजोको जनप्रतिनिधि भएकोले नगर कमिटीले बोलाएर आएको दाबी गरेका छन् ।
त्यस्तै, अर्को पक्षले आयोजना गरेको कार्यक्रममा सहभागी पार्टीका पोलिटब्युरो सदस्य गौरी ओलीले आफूलाई पार्टीले अभियानका लागि खटाएकोले आफ्नो कार्यक्रम आधिकारिक रहेको दाबी गरिन् ।
उनले शुक्रबार जे घटना घट्यो त्यो केन्द्रमा स्पष्ट रिपोर्टिङ गर्ने समेत बताइन् ।
केन्द्रले साँफेबगर नगरपालिकामा अभियान सञ्चालनको लागि पोलिट ब्युरो सदस्य गौरी ओलीलाई पठाएकोमा डा.भीम बहादुर रावल पक्षले रावललाई प्रमुख अतिथि बनाएर छुटै कार्यक्रम सञ्चालन गरेको हो ।
दुई पक्षले साँफेबगरमै छुट्टाछुट्टै कार्यक्रम गर्दा केही समय तनाव भएको थियो । पछि सुरक्षाकर्मी परिचालन गरी अवस्थालाई सामान्य पारिएको थियो । पार्टीको ब्यानरमा छुटै कार्यक्रम गर्ने कार्यविधि विधान विपरीत भएको नेकपा एमाले अछाम जिल्ला अध्यक्ष चन्द्र बोहराले बताएका छन् ।
डा.भीम बहादुर रावल अछाममा भएकाले रावललाई प्रमुख अतिथि बनाएर गौरी ओलीलाई विशिष्ट अतिथि बस्न भनेको तर उनले नमान्दा कार्यक्रम फरक–फरक भएको साँफेबगर नगर कमिटी अध्यक्ष ढकेन्द्र कुँवरको भनाइ रहेको छ । आफू नगरको अध्यक्ष भएकोले रावल उपस्थित कार्यक्रम आधिकारिक भएको कुँवरको दाबी छ ।
रावल उपस्थित कार्यक्रममा करिब डेढ सयको हाराहारीमा सहभागिता रहेको तर ओली सहभागी कार्यक्रममा करिब ६० जनाको हाराहारीमा उपस्थिति रहेको जनाइएको छ ।
