काठमाडाैं । चिकित्सकमाथि भएको कुटपिटको विरोधमा नेपाल चिकित्सक संघले आइतबार देशभरका स्वास्थ्यसंस्थाको आकस्मिकबाहेकका स्वास्थ्य सेवा ठप्प पार्ने निर्णय गरेको छ ।
शनिबार बसेको संघको बैठकले शुक्रबार राष्ट्रिय ट्रमा सेन्टरको चिकित्सक डा.जनिथलाल सिंहमाथि प्रहरीले गरेको कुटपिटको विरोधमा देशभर आकस्मिकबाहेक स्वास्थ्य सेवा अवरोधको निर्णय गरेको हो ।
शुक्रबार राष्ट्रपति विद्यादेवी भण्डारीको सवारी क्रममा प्रहरीले चिकित्सक सिंहलाई कुटपिट गरेको थियो । चिकित्सक संघका अध्यक्ष डा.लोचन कार्की र महासचिव डा.बद्री रिजालले शनिबार विज्ञप्ति जारी गरी नेपाली नागरिकहरुकै शासनको रुपमा रहने लोकतान्त्रिक गणतन्त्रमा समेत नागरिक स्वयंलाई नै यो वा त्यो बाहानामा दुःख, सास्ती दिनु अशोभनीय भएको बताउनुभएको छ।
यसैबीच,चिकित्सक कुटपिट गर्नेलाई कारबाहीको माग गर्दै शनिवार माइतीघर मण्डलमा प्रदर्शन भएको छ । प्रर्दशनमा सहभागीहरुले भीभीआईपी चाहिँदैन,जनता कुट्न पाइँदैन,बर्दी लगाएका गुन्डा मुर्दावाद, स्वास्थ्यकर्मी माथि हिंसा बन्द गर लगायतका नारासहितका प्लेकार्ड बोकेर विरोध गरेका थिए ।
