काठमाडौं । इलामका ३६ वर्षीय प्रेमप्रसाद आचार्यको आत्मदाह पछि उपचारका क्रममा निधन भएपछि सामाजिक सञ्जाल उनकै विषयलाई लिएर तरंगित बनेको छ ।
उनको आत्मदाहलाई लिएर नेता,मन्त्री कलाकार लगायतले सामाजिक सञ्जालमा विभिन्न भनाइहरु राखेका छन् । आचार्यको आत्मदाहलाई कसैले सरकारको कमजोरी,कसैले विगतको बेथिति आदि कारण मानेका छन् । मंगलबार नयाँ बानेश्वरस्थित संसद भवन अगाडि आफ्नो शरीरमा आगो लगाएर आत्मदाह गरेका आचार्यको उपचारको क्रममा बुधबार बिहान निधन भयो । उनको निधनसँगै सामाजिक सञ्जाल तातेको छ । सबैले उनलाई श्रद्धाञ्जली दिंदै फेसबुकका भित्ता भरेका छन् ।
सामाजिक सञ्जालमा देखिएको स्टाटसहरूमा गृहमन्त्री रवि लामिछाने, काठमाडौं महानगरपालिकाका मेयर बालेन शाह, विभिन्न राजनीतिक दलका नेता, कलाकार, बुद्धिजिवी लगायतले आ–आफ्नो भनाई सार्वजनिक गरेका छन् ।
उपप्रधान एंव गृहमन्त्री रवि लामिछानेले आफैंलाई आगो लगाएर जलाउने प्रेमप्रसाद आचार्यको निर्णयमा आफूहरू दोषी रहेको बताएका छन्। उनले लेखेका छन्, ‘दुख त मलाई यसमा लागेको छ कि हामी जस्ता नयाँहरुको आगमनले समेत तपाईमा उत्साह थप्न सकेन, आशा जगाउन सकेन, आत्मदाहको निर्णय फेर्न सकेन। यसमा हामी दोषी छौं, म दोषी छु।
त्यस्तै, काठमाडौं महानगरपालिकाका मेयर बालेन शाहले आचार्यको आत्मदाहको सबैभन्दा ठूलो कारण राज्य भएको बताएका छन् । उनले समाजिक सञ्जालमा लामो स्टाटस लेख्दै राज्य असफल रहेको बताएका हुन् । उनले लेखेका छन्, ‘राज्यका हरेक तप्का, निकाय र अंगहरु असफल भएका छन् । नागरिकका रुपमा, जनप्रतिनिधीका रुपमा, सत्ताका अगुवाका रुपमा, सञ्चारमाध्यमका रुपमा हामी सबै असफल भइरहेका छौँ ।
त्यसैगरी नेपाली कांग्रेसका केन्द्रीय सदस्य डा. शेखर कोइरालाले आचार्यको आत्मदाहको घटनाले राज्य लज्जित भएको सामाजिक सञ्जाल मार्फत बताएका छन् । ‘हामी अझै युवाले गरेको आत्मदाह र त्यस पछाडिको कारणवारे वहस गरेर अब त्यस्तो परिस्थिति दोहोरिन नदिने वातावरणको श्रृजना गर्ने कि सत्ताको अंकगणित मै अल्झिरहने ?’ भन्दै प्रश्न समेत गरेका छन् ।
त्यस्तै, कलाकारहरूले पनि सामाजिक मार्फत आफ्नो भनाइ राखिरहेको छन् । यसैबीच अभिनेता निश्चल बस्नेतले पनि उक्त आत्मदाहको बारेमा लेखेका छन् । उनले सरकार कसरी असफल भएर पनि देशको जिम्मेवारी बोकेर बसेको बताएका छन् । ‘उनले लेखेका छन्, सरकारमा बस्ने,संसदमा बस्नेले राज्यलाई जिम्मेवार अब पनि नबनाउने हो भने जुनसुकै पार्टीको सरकार बनेपनि जनताको सरकार कहिले बन्ने छैन । संसदमा सुनाइयोस् वहाँ ले लेखेका कुराहरू, बुझ्नेले धेरै काम गर्नेछन् जनताकोलागि ,नबुझ्नेले जे गरिरहेकाछन् त्यै गर्नेछन् ,मात्र भन्नेछन् हार्दिक श्रदाञ्जली’ ।
आचार्यको आत्मदाहाको विषयलाई लिएर समाजका अन्य विभिन्न व्यक्तिहरुले पनि सामाजिक सञ्जालका वालमा श्रद्धाञ्जली सहित आ–आफ्ना विचार राखेका छन् ।
