काठमाडौं । सरकारले पोखरामा आइतबार भएको यति एयरलाइन्सको विमान दुर्घटनाको शोकमा सोमबार देशभर सार्वजनिक बिदा दिएको छ ।
दुर्घटनमा जनधनको ठूलो क्षति भएको भन्दै सरकारले सोमबार देशभर बिदा दिने र राष्ट्रिय झण्डा आधा झुकाउने निर्णय गरेको हो । अत्यावश्यक बाहेकका सबै सेवा तथा कार्यक्रमहरु स्थगित गरिएको गृह मन्त्रालयले जनाएको छ । २५ औं राष्ट्रिय भूकम्प दिवसका कार्यक्रमहरु समेत स्थगित गरिएको छ । साेमबारका लागि निर्धारित परीक्षाहरु भने यथावत रूपमा संचालन हुने जनाइएको छ ।
बिदा दिने सरकारी निर्णयको भने सर्वत्र आलोचना भएको छ । आइतबार बिहान काठमाडौंबाट पोखराका लागि उठेको यति एयरलाइन्सको विमान १० बजेर ३२ मिनेट जाँदा पोखरा विमानस्थल नजिकै सेती नदीको खोंचमा खसेर दुर्घटना भएको थियो । विमानमा रहेका चालक दलका ४ जना तथा ६८ जना यात्रु रहेकोमा ६९ जनाको शव फेला परेको छ भने ३ जनाको अवस्था पत्ता लागेको छैन ।
विमानमा ५३ जना नेपाली, ५ जना भारतीय, ४ जना रसियन, २ जना कोरियन, आयरल्याण्ड, अष्ट्रेलिया, अर्जेन्टिना र फ्रान्सका १–१ जना गरी १५ जना विदेशी नागरिक रहेको नेपाल नागरिक उड्ययन प्राधिकरणले जनाएको छ । दुर्घटनाग्रस्त विमानमा २५ महिला, ३७ पुरुष, ३ बालक र ३ शिशु सवार रहेका थिए ।
