काठमाडौँ । गण्डकी प्रदेशका नवनियुक्त मुख्यमन्त्री खगराज अधिकारीले प्रमुख प्रतिपक्षी दल नेपाली कांग्रेससँग पनि विश्वासको मत मागेका छन् ।
विहिबार एक पत्र पठाउँदै अधिकारीले औपचारिक रुपमै मत मागेका हुन् । ‘म ३३ सांसदको बहुमत समर्थनबाट मुख्यमन्त्रीमा नियुक्त भएको अवगत नै छ,’ पत्रमा उल्लेख गरिएको छ, ‘मलाई विशवासको मत दिनुहुन् सम्पूर्ण सदस्यहरुमा अनुरोध गर्दै प्रश्ताव गरेको छु । उनले सबै दलका नेताहरुलाई पत्र पठाएर विश्वासको मतका लागि समन्वय गरिदिन आग्रह गरेका छन् ।
अधिकारीले पत्र पठाए लगत्तै एमाले प्रमुख सचेतक रोशन गाहा मगरले पनि सबै दलहरूसँग अनौपचारिक भेट गरेका छन् । ‘२०५१ पछि २०७९ साल केन्द्रमा ऐतिहासिक बनेको छ । संघीय व्यवस्थापछि नयाँ नजिर हो । प्रधानमन्त्रीले सबै माननीयको विश्वास पाउनुभएको छ,’ उनले भने, ‘त्यही नजिरलाई प्रदेशमा पनि स्थापित गर्नुपर्छ भनेका छौँ । नेपाली कांग्रेसले निर्णय गरेर जवाफ दिन्छौँ भनेको छ ।
यही विषयमा छलफल गर्न शुक्रबार नेपाली कांग्रेस संसदीय दलको बैठक बोलाइएको छ । मगरले नेपाली कांग्रेसले विश्वासको मत दिए प्रतिपक्ष विहीन बजेट बनाउने बताएका छन् । ‘प्रतिपक्ष विहीन बजेट बनाउने छौँ, जनचाहाना पूरा गर्न एकजुट भएर लागौँ भनेको छु,’ उनले भने, ‘मलाई विश्वास छ कि नेपाली कांग्रेसले पनि मुख्यमन्त्रीलाई विश्वासको मत दिएर सकारात्मक नजिर स्थापित गर्ने छ । नेपाली कांग्रेस नेता सुरेन्द्रराज पाण्डेले भने दलमा छलफल नगरी निर्णयमा पुग्न नसकिने बताएका छन् ।
