काठमाडौं । जग्गा अधिग्रहण गरिएको ४७ वर्षपछि पोखराको क्षेत्रीय अन्तर्राष्ट्रिय विमानस्थल सञ्चालनमा आएको छ । अंग्रेजी नयाँ वर्ष सुरु भएसँगै विमानस्थल व्यावसायिक रुपमै सञ्चालनमा आएको हो । २००७ सालको क्रान्तिलगत्तै २००८ सालदेखि पोखरासँग हवाई यातायातको साइनो जोडिएको हो । घाँसे मैदानमा चरिरहेका गाई धपाएर जहाज अवतरणबाट सुरु इतिहास ७१ वर्षपछि अन्तर्राष्ट्रिय विमानस्थलमा अनुवाद भएको हो ।
पाँच दशकअघि प्यासिफिक एशोसिएशन अफ ट्राभल एजेन्सीले थाइल्यान्डको पटाया र पोखराको पर्यटन विकासका लागि विमानस्थल निर्माणको गुरुयोजना तयार पारेको थियो । २०३२ सालको अन्त्यतिर विमानस्थल निर्माणका लागि तात्कालीन छिनेडाँडा गाउँ विकास समितिको डडुवाखर्क, मझेरीपाटन, छिनेडाँडा र हालको पोखरा महानगरपालिका–१४ को जग्गा अधिग्रहण थालिएको थियो ।
जग्गा अधिग्रहणको ४७ वर्षपछि नयाँ क्षेत्रीय अन्तर्राष्ट्रिय विमानस्थल तयार भएको हो । २००८ सालमा पोखराको खुला चौरमा पूर्वाधार विना नै डकोटा जहाज अवतरण भयो । जहाजमा पाइलटसँगै तत्कालीन यातायातमन्त्री गणेशमान सिंह ओर्लिनुभएको थियो । त्यतिबेला हिमालय एभिएशन नामको भारतीय कम्पनीले डकोटा विमानबाट हवाई सेवा प्रदान गरेको थियो ।
१६ रुपियाँमा टिकट काटेर जहाजमा आवतजावत गर्ने अझै जीवितै छन् । त्यसबेला पोखराबाट काठमाडौं, भैरहवा, नेपालगञ्ज दर्जनौं क्षेत्रीय उडान हुने गरेको सम्झनेहरु उत्तिक्कै छन् । विमानस्थल उद्घाटनका लागि दुई दिनअघि स्याङजाबाट पोखरा झरेका ८२ वर्षिय ज्येष्ट नागरिक आफ्नै आँखाले अभूतपूर्व विकास देखेर दंग भएका बताउछन् । यसले यसक्षेत्रकै विकासमा कायापलट हुने विश्वास राख्छन् ।
स्थानीय मात्र हैन, विमानस्थल सञ्चालन भएकै दिन विमानमा यात्रा गर्न पाउँदा खुसी साटासाट गर्नेको कमी थिएन । क्षेत्रीय विमानस्थलको निर्माणसँगै सिंगो मुलुकले पर्यटन क्षेत्रमा उपलब्धी हासिल हुने विश्वास छ । विमानस्थलले पोखरामात्र होइन नेपालकै लागि सम्वृद्धि ल्याउनेमा पोखराबासी विश्वासमा छन् ।
क्षेत्रीय विमानस्थल सुरु भएसँगै उनीहरुमा देखिएको खुसी निरन्तरताका लागि पर्यटकको आवागमन नै पहिलो र अन्तिम विकल्प हो । उनीहरुका लागि सहज, सस्तो र सुरक्षित सेवा अपेक्षित छ ।
खर्च गर्न सामथ्र्य राख्ने पर्यटकलाई जति अड्याउन सकिन्छ, व्यवसाय उति फस्टाउँछ । अन्तर्राष्ट्रिय विमानस्थलको औचित्य त्यतिबेला पुष्टि हुन्छ, जतिबेला लाखौं पर्यटकको भीड ओइरिन्छ । नत्र विमानस्थल बन्ने तर चरोमुसो नदेखिने भैरहवा विमानस्थलको रोग यता नसर्ला भन्न सकिन्न ।
