काठमाडौं । नेपाली कांग्रेसका महामन्त्रीद्वय गगनकुमार थापा र विश्वप्रकाश शर्माले पार्टीमा भएका कमीकमजोरीलाई ढाकछोप नगरी खुला र पारदर्शी छलफल गर्नुपर्ने बताएका छन् ।
राष्ट्रिय एकता तथा मेलमिलाप दिवसको अवसरमा शनिबार शुमकामना सन्देश जारी गर्दै महामन्त्रीद्वय थापा र शर्माले गत मंसिर ४ गते सम्पन्न भएकाे निर्वाचनपछि मुलुकमा भिन्न राजनीतिक परिस्थिति निर्माण भएको बताएका हुन् । साथै विकसित राजनीतिक परिस्थितिको लागि पार्टीमा भएका कमीकमजोरी माथि पारदर्शी छलफल गर्नुपर्ने महामन्त्रीद्वय थापा र शर्माकाे जाेड छ ।
प्रतिनिधि सभा निर्वाचनको परिणामबाट सबै भन्दा ठूलो दल भएर पनि कांग्रेस प्रतिपक्ष बन्न पुग्दा पार्टीभित्र गम्भीर असन्तुष्टि, आक्रोश तथा उदासिनता छाएको र त्यो अस्वभाविक नभएको जिकीर गर्दै थापा र शर्माले यतिबेला आफूहरू माझ दुई वटा दायित्व रहेको बताएका छन् ।
पहिलो आग्रह र पूर्वाग्रहमुक्त भएर संयमतापूर्वक समग्र घटनाक्रम, त्यसबाट उत्पन्न परिस्थितिको इमान्दार समीक्षा गर्ने, दोस्रो यसबीचमा हाम्रो असावधानी, कमजोरी, गल्ती जे भएको छ, त्यसलाई कुनै ढाकछोप नगरी खुला, पारदर्शी छलफल मार्फत कारण र कारकको प्रष्ट पहिचान गरेर अबको मार्गचित्र तय गर्ने गरी दुई वटा अहम् दायित्व रहेको थापा र शर्माकाे तर्क छ । कांग्रेसले गम्भीर आत्म समीक्षा र आत्म मूल्यांकन गर्दै सुविचारित ढंगबाट अबको बाटो तय गर्ने दुवै जनाकाे भनाइ रहेकाे छ।
त्यस्तै, गठबन्धनको सरकार बनाउन पर्याप्त गृहकार्य र सावधानी पुर्याउन नसक्दा सत्ताको राजनीतिमा यो पटकपछि परेको थापा र शर्माकाे दावी छ । महामन्त्रीद्वय थापा र शर्माले अब सरकारलाई जनताप्रति जवाफदेही बनाउन जिम्मेवार प्रतिपक्षको रुपमा सशक्त भूमिका निर्वाह गर्ने प्रतिवद्धता समेत व्यक्त गरेका छन् ।
