काठमाडौं । सिन्धुलीमा यति बेला जुनार पाकेर पहेलपुर भएका छन् ।
जुनार खान योग्य भएपछि बिक्री वितरणका लागि बजारमा समेत ल्याइएकाे हाे । सिन्धुलीको वीपी राजमार्गको खनियाखर्क, खुर्कोट र सिन्धुली माडी बजार लगायतका मुख्य बजारहरुमा जुनार पाइन थालेका छन् । सिन्धुली सुन्तला र जुनार उत्पादनका लागि नेपालकै मुख्य जिल्ला मानिएको छ । यस वर्ष करिब १६ हजार मेट्रिक टनको हाराहारीमा जुनार उत्पादन भएको एक तथ्यांकले देखाएको छ ।
यस वर्ष करिब १९ हजार मेट्रिक टन जुनार उत्पादन हुने अनुमान गरिए पनि विभिन्न प्राकृतिक प्रकोपका कारणले सोही अनुसारको उत्पादन हुन नसकेको हो । सिन्धुलीको जुनार बिक्री–वितरणबाट यसवर्ष करिब ७५ करोड रुपैयाँकाे आम्दानी हुने अनुमान गरिएकाे छ ।
सिन्धुलीमा यसपालीे गुणस्तरीय जुनारको मूल्य सरदर प्रतिकेजी ८० देखि १ सय रुपैयाँ भएको पाइएको छ । प्रधानमन्त्री कृषि आधुनिकीकरण परियोजना जुनार सुपरजोनको एक तथ्यांकका अनुसार यस वर्ष सिन्धुलीका विभिन्न स्थानहरुमा कुल २ हजार ५ सय हेक्टर क्षेत्रफलमा जुनारखेती भएपनि ती मध्धे कुल १ हजार हेक्टर जमिनमा जुनारको गुणस्तरीय रुखहरुबाट फल उत्पादन भएको जनाइएको छ ।
सिन्धुलीमा जुनार खेती हुने विभिन्न खेती योग्य स्थानहरुमा जुनारको उत्पादकत्व प्रतिहेक्टर २० दशमलव २ मेट्रिकटन रहेको अनुमान गरिएको छ । जुनारखेती खासगरी समुन्द्री सतहबाट ७ सय ५० मिटरदेखि १ हजार ३ सय मिटर सम्मको उच्चाईको भू-भागमा राम्रोसँग हुने गर्दछ । प्रायः हरे कवर्ष असिना र पानीका कारण बोटबाटै फल झर्ने र बिग्रने गरेकाले जुनारको उत्पादन घटने गरेको छ ।
यहाँ उत्पादन भएका जुनारलाई नाश हुन नदिन मित्र राष्ट्र जापान सरकारको सहयोगमा सिन्धुली माडीमा कोल्ड स्टोरको निर्माण गरिए पनि सञ्चालन नभएकाले स्थानीय कृषकहरुले सुविधा लिन पाएका छैनन् ।
