दमौली । गएको स्थानीय तहको निर्वाचनमा पार्टीले योगदानअनुसार टिकट वितरण नगरेको भन्दै नेपाली कांग्रेस तनहुँको सचिवबाट राजीनामा गरेका विश्व बास्तोलाले तनहुँ १ बाट उम्मेदवारी दिने घोषणा गरेका छन् ।
आफू अहिले कुनै दलमा नभएकाले स्वतन्त्र उम्मेदवारी दिने उनले बताएका छन् ।
तनहुँ १ बाटै कांग्रेस नेता रामचन्द्र पौडेलले पनि चुनाव लड्ने तयारी गरिरहेका छन् । कुनै बेला पौडेल निकट रहेका बास्तोलाले पौडेल विरुद्ध नै उम्मेदवारीको घोषणा गरेका हुन् ।
यथास्थितिवादका विरुद्ध र परिवर्तनको पक्षमा आफूले उम्मेदवारी दिने घोषणा गरेको बास्तोलाले बताएका हुन् । उनले भने, ‘नयाँ बोतलमा पुरानै रक्सी सजाय जस्तै भयो । अब परिवर्तन हामीबाट नै सुरु गर्ने हो ।
पार्टीको प्रदेश समितिले व्यास नगरपालिकाको मेयर उम्मेदवारमा आफूलाई सिफारिस गरे पनि पौडेलले तनहुँका निवर्तमान सभापति वैकुण्ठ न्यौपानेलाई उम्मेदवार बनाएको भन्दै बास्तोलाले कांग्रेस त्यागेको घोषणा गरेका थिए ।
क्षेत्र नं. १ मा यसअघि नै प्रविन पौडेल र पृथ्वीनारायण श्रेष्ठले स्वतन्त्र उम्मेदवारी घोषण गरिसकेका छन् ।
