©पुष्कर खड्का
रामेछाप । रामेछापको गोठगाउँ गोगनेमा नेपाली काँग्रेसका केन्द्रीय उपसभापति धनराज गुरूङ सवार गाडी दुर्घटना भएको छ।
उपसभापति गुरूङसहित पाँच जना सवार बा १९ च १८३९ नम्बरको स्कार्पियो गाडी रामेछापको रामेछाप नगरपालिका वडा नं(१ गोठगाउँ गोगने स्थित पानी चौर भन्ने स्थानमा दुर्घटना भएको रामेछापका महाधिवेशन प्रतिनिधि रत्न कार्कीले जानकारी दिनु भयो ।
उहाँले दिएको जानकारी अनुसार नेपाली काङ्ग्रेसका केन्द्रीय सदस्य प्रदिप सुनुवारको श्रीमतीको निधन भएकोमा उहाँको परिवार जनप्रति समवेदना प्रकट गर्ने ओखलढुङ्गा खिजिदेम्बा गाउँपालिका खिजि फलाटे निजि निवासमा बुधबार पुगेर आज बिहिवार रामेछाप मन्थली तर्फ फर्किने क्रममा गाडी दुर्घटना भएको बताउनु भयो ।
स्कार्पियो गाडी सडक किनारबाट थोरै तल झरेको तर अगाडि ढुंगाको ओत लागेकाले ठूलो दुर्घटनाबाट जोगिएको उपसभापति गुरूङले सामाजिक संजाल फेस्बुक मार्फत जानकारी दिनुभएको छ । उहाँले आफू सहित सबै जना सवार सकुशल रहेको जानकारी गराउनुभएको छ ।
उहाँले सामाजिक संजाल फेस्बुक,ट्वीटरमा गाडीको फोटो राख्दै लेख्नुभएको छ, ‘ठूलो घटना हुनबाट जोगियो रामेछाप गोगनेमा हामी चढेको गाडी अचानक सडक किनारबाट तल गयो तर अगाडि ढुंगाको ओट लाग्न पुगेकाले ठूलो घटना हुनबाट जोगियो । भगवानको कृपाले हामी सबै सकुशल छौं ।’
गाडीमा सवार उपाध्यक्ष गुरुङसहित रामेछापका महाधिवेशन प्रतिनिधि रत्न कार्की, ललितपुर जिल्ला सदस्य सानुबाबु महर्जन लगायत पाँच जना थिए ।
