काठमाडौं । राष्ट्रिय स्वतन्त्र पार्टीका सभापति रवि लामिछानेले ‘द लिडर’ नामक कार्यक्रम गर्ने भनेर रकम उठाएर ठगी गरेको खुलासा भएपछि तनावमा परेका छन् ।
पूर्वसञ्चारकर्मी लामिछानेले “द लिडर “नामक कार्यक्रम गर्ने भनेर रजिष्ट्रेसन शुल्क वापत १ हजारका दरले उठाएका थिए । लामिछाने सोही कार्यक्रमका नाममा ठगी गरेको कुरा बाहिरिएपछि सभापति लामिछानेले रकम फिर्ता गर्न पहल गर्ने आश्वासन दिएका छन् । लामिछानेले ३०९ जनाको पैसा फिर्ता गरेका छैनन् ।
काठमाडौंमा शुक्रबार भएको पत्रकार सम्मेलनमा सभापति रवि लामिछानेले रजिष्ट्रेसन गरेका आकांक्षीको पैसा फिर्ता दिनु आफ्नो नैतिक दायित्व भएको बताएका छन् । द लिडर कार्यक्रमका लागि ११९२ जनाले रजिष्ट्रेसन गरेका थिए । ८८३ जनाले पैसा फिर्ता लिइसकेको लामिछानेले दाबी गरेका छन् ।
लामिछानेले २०७६ मंसिर २६ गते द लिडर कार्यक्रम घोषणा गरेका थिए ।
लामिछानेले द लिडरका विजेतालाई काठमाडौंमा अपार्टमेन्ट, गाडी र २० लाख रूपियाँ नगद पुरस्कार दिने भनिएको थियो । कार्यक्रममा बाबुराम भट्टराई, सुशीला कार्की, रवीन्द्र मिश्र, प्रदीप गिरी र प्रदीप नेपाल निर्णायक थिए । कार्यक्रमलाई न्युज २४ टेलिभिजन, रमाइलो टिभी एचडी र गुन्द्रुक एपबाट प्रसारण हुने भनिएको थियो । लामिछानेले न्युज २४ छाडेर ग्यालेक्सी फोरके टेलिभिजन खोलेपछि कार्यक्रम त्यहीँ प्रसारण हुने अपेक्षा गरिएको थियो । लामिछानेले कार्यक्रम प्रशारण गरेनन् ।
कार्यक्रम उत्पादक एसआरबिएन मिडियाका प्रमुख कार्यकारी विपिनकुमार आचार्य पनि लामिछानेको टिममै थिए । लामिछाने ग्यालेक्सी फोरके गएपछि उनी पनि त्यहीँ गएका थिए । आचार्य अहिले ग्यालेक्सी फोरकेमै क्रियटिभ डाइरेक्टर छन् ।
कार्यक्रम गर्छु भनेर पहिला सर्वसाधारण प्रलोभनमा पारेर रकम उठाउने । पछि कार्यक्रम नगरेर ठगी गर्ने लामिछानको हर्कतले ठगिएका हजारौँ सर्वसाधारण चिन्तित बनेका छन् । अनुशासन, नियम, कानून र संविधानको कुरा गर्ने लामिछानेले द लिडर कार्यक्रममा नाममा ठगी गरेका छन् । विवादमा परेपछि लामिछानेले पैसा फिर्ता गर्ने भनेर पन्छिन खोजेका छन् ।
बालुवाटार जग्गा काण्डमा एमालेका उपाध्यक्ष एवम् पूर्वमन्त्री विष्णु पौडेल विवादमा परेका थिए । कारबाहीमा पर्ने डरले त्यो जग्गा पौडेलले सरकारका नाममा फिर्ता गरेका थिए । एमालेका नेता पौडेलको त्यस बेला आलोचना गरेका सभापति लामिछाने आफै त्यस्तै काण्डमा परेका छन् । कारबाहीबाट बच्न लामिछानेले पैसा फिर्ताको फण्डा गरेका छन् ।
पूर्वसञ्चारकर्मी लामिछानेका धेरै काण्ड छन् । त्यस बेला लामिछाने सञ्चारकर्मी रहेकाले डरले पीडितहरू डरले बोल्न सकेका थिएनन् । अब लामिछानेका कर्तुतहरू पीडितहरूले क्रमशः भण्डाफोर गर्न थालेका छन् ।
लामिछानेले कहाँ–कहाँ ? को–कोसँग के–के ? विषयमा बार्गेनिङ गरेका थिए ती सबै कुरा क्रमशः बाहिर आउने टिप्पणी हुन थालेका छन् । लामिछानेले आफ्नो ससुरा उद्धव पौडेलका बारेमा कुनै पनि कुरा बाहिर ल्याएनन् । उद्धव पौडेल राप्रपाका नेता हुन् । उनी गोपीकृष्ण मुभिजका मालिक र ओम अस्पतालका पनि मालिक हुन् । ओम अस्पतालको विवादका बारेमा समाचार नदिएर ससुरालाई बचाएका थिए ।
