काठमाडौँ । प्रहरी महानिरीक्षक धीरजप्रताप सिंहले राष्ट्रिय प्रहरी प्रशिक्षण प्रतिष्ठान महाराजगञ्जको निरीक्षण भ्रमण गरेका छन् ।
निरीक्षणपश्चात् प्रहरी महानिरीक्षक सिंहले प्रतिष्ठान परिसरमा वृक्षरोपणसमेत गरेका छन् । निरीक्षणपश्चात् आयोजित कार्यक्रममा प्रहरी महानिरीक्षक सिंहले नेपाल प्रहरी शिक्षालय भरतपुर, काठमाडौँ उपत्यका प्रहरी शिक्षालय महाराजगञ्ज, नेपाल प्रहरी युक्ति तालिम महाविद्यालय जर्गाह नवलपरासी र सातै प्रदेश प्रहरी तालिम केन्द्रका प्रतिनिधिलाई प्रहरी सहायक निरीक्षक र प्रहरी जवान आधारभूत तालिमको प्रशिक्षण म्यानुअल हस्तान्तरण गरेका छन् ।
उनले प्रशिक्षार्थीलाई तालिमप्रति उत्प्रेरित गर्न प्रशिक्षण वातावरण, प्रशिक्षार्थीले पाउने सुविधा, प्रशिक्षण सामग्रीको उपलब्धता, प्रशिक्षार्थीप्रतिको व्यवहारलगायत तत्व हुनुपर्ने उल्लेख गर्दै प्रशिक्षणमैत्री वातावरण बनाउन प्रतिष्ठान केन्द्रित हुनुपर्नेमा जोड दिए ।
समारोहमा प्रहरी महानिरीक्षक सिंहले प्रतिष्ठान परिसरमा उच्चस्तरको अनुशासन प्रस्तुत गर्न निर्देशन दिए।
