काठमाडौँ । सत्ता साझेदार पाँच दलले गठबन्धनका साझा उम्मेदवारबाहेक स्थानीय तह निर्वाचनका लागि मनोनयन दर्ता गराएका उम्मेदवारहरूलाई उम्मेदवारी फिर्ता लिन आग्रह गर्ने भएका छन् । गठबन्धन शीर्ष नेताहरूले साझा उम्मेदवारबाहेक अन्य नेताहरूले दर्ता गरेको मनोनयन फिर्ता लिन आग्रह गर्ने भएका हुन् ।
देशभर कहाँ कति स्वतन्त्र उम्मेदवारी परेको छ भनेर तथ्याङ्क सङ्कलन भइरहेको कांग्रेसका वरिष्ठ नेता तथा पाँच दलीय संयन्त्र निर्वाचन तयारी तथा अनुगमन समितिका संयोजक रामचन्द्र पौडेलले जन प्रहारलाई जानकारी दिए । उनकाअनुसार तथ्याङ्क सङ्कलन सकिएपछि आजै शीर्ष नेताहरूले साझा उम्मेदवारबाहेक अन्य नेताहरूले दर्ता गरेको मनोनयन फिर्ता लिन आग्रह गर्नेछन् ।
फिर्ता नभए पार्टी अनुशासनको कारबाही हुने उनको भनाई छ । ‘साझा उम्मेदवारबाहेकका साथीहरूलाई मनोनयन फिर्ता लिन आग्रह गर्छौँ । पार्टीमा उहाँहरूले गर्नुभएको योगदानको मूल्याङ्कन हुन्छ, नेता पौडेलले भने, ‘अहिलेलाई उहाँहरूले पार्टीलाई सहयोग गर्नुपर्छ । पार्टीको निर्णय मान्नुको विकल्प पनि छैन । यही आग्रह सबै साथीहरूलाई गर्छौँ ।
माओवादी केन्द्रका प्रमुख सचेतक देवप्रसाद गुरुङले पनि सत्ता गठबन्धनका दलहरूले पालिका चुनावमा आफूखुसी दिएको उम्मेदवारी फिर्ता गराउन सबै ठाउँमा पहल भइरहेको बताए । ‘कतिपय पालिका र वडामा दलहरूले आ-आफ्नो दलका तर्फबाट मनोनयन दर्ता गराएका छन् । संवाद चलाउँदै लगेर नाम फिर्ता लिने बेलासम्म सबै ठाउँमा सहमति जुटाउन प्रयास भइरहेको छ,’ उनले भने, ‘गठबन्धनका दलहरूबीचको सहमति विपरीत भएको उम्मेदवारी फिर्ता हुन्छ, हामी संयुक्त रूपमा आग्रह गर्छौँ ।
कांग्रेस, माओवादी केन्द्र, नेकपा एकीकृत समाजवादी, जनता समाजवादी पार्टी नेपाल र राष्ट्रिय जनमोर्चाले वैशाख ३० गतेको स्थानीय तह निर्वाचनमा साझा उम्मेदवार उठाउने निर्णय गरेका छन् । तर केही ठाउँमा गठबन्धनमा असहमति जनाउँदै उम्मेदवारी दर्ता भएको छ भने केहीमा पार्टीबाटै बागी उम्मेदवारी परेको हो ।
