काठमाडौँ । नेकपा एमालेले वैशाख ३० गते हुन गइरहेको स्थानीय तहको निर्वाचनका लागि पार्टीको तर्फबाट रामेछापमा आठ वटै स्थानीय तहको प्रमुख-उपप्रमुखको उम्मेदवार टुंगो लगाएको छ ।
एमालेले गोकुलगंगा गाउँपालिकामा पूरानै अनुहारलाई नै दोहोराएको छ । एमाले स्रोतका अनुसार गोकुलगंगा गाउँपालिका प्रमुखमा खड्गबहादुर सुनुवार र उपप्रमुखमा राधिका श्रेष्ठ नेवारलाई नै दोहोराएको जानकारी एमाले स्रोतले जन प्रहारलाई बताएको हो ।
त्यस्तै मन्थली नगरपालिकाको नगर प्रमुखमा लव श्रेष्ठ र उपप्रमुखमा ईश्वरी बस्नेत, रामेछाप नगरपालिकाको नगर प्रमुखमा रोशन पाख्रिन र उपप्रमुखमा सीता खत्री, सुनापति गाउँपालिकाको अध्यक्षमा ज्ञान कुमार योञ्जन र उपाध्यक्षमा रिता गौतम, दोरम्बा गाउँपालिकाको अध्यक्षमा टंक चौलागाई, खाँडादेवी गाउँपालिकाको अध्यक्षमा ज्ञान कुमार श्रेष्ठ र उपाध्यक्षमा रमा घिसिङलाई उम्मेदवार बनाएको छ ।
एमालेले लिखु तामाकोसी गाउँपालिकाको अध्यक्षमा कमल कडरिया र उपाध्यक्षमा दीपा पाख्रिन, उमाकुण्ड गाउँपालिकाको अध्यक्षमा शेरबहादुर सुनुवार र उपाध्यक्षमा गंगा कार्कीलाई उम्मेदवार बनाएको बताइएको छ ।
गोकुलगंगा गाउँपालिकामा सुनुवार र श्रेष्ठले अघिल्लो कार्यकालमा उत्कृष्ट काम गरेकाले दोहोराएको एमाले स्रोतले जन प्रहारलाई बताएको छ ।
सुनुवार र श्रेष्ठले अघिल्लो कार्यकालमा पालिकामा पूर्वाधार विकासको काममा उत्कृष्ट योगदान दिएको एमालेको दाबी रहेको छ । उनीहरुले शुरुवात गरेको पूर्वाधार विकासलाई पूर्णता दिनको लागि पनि उनीहरुलाई नै दोहोराउनु परेको एमालेले स्रोतले जनाएको छ।
