काठमाडौँ । नेपाली कांग्रेसका केन्द्रीय सदस्य सुनिलबहादुर थापाले चेलीबेटीहरू सांसदबाटै असुरक्षित रहेको टिप्पणी गरेका छन् । गृह जिल्ला धनकुटामा आयोजित चुनावी सभालाई सम्बोधन गर्दै थापाले चेलीबेटीहरू सांसदबाटै असुरक्षित रहेको टिप्पणी गरेका हुन् ।
सेनाभन्दा सांसदबाट असुरक्षित रहेको भन्दै पूर्व मन्त्रीसमेत रहेका थापाले चेलीबेटीहरूले होसियार रहनुपर्ने बताए । ‘यदि हाम्रा चेलीबेटीमाथि कसैले शंका गर्नुपर्छ भने त्यो हाम्रै सांसहरुबाट गर्नुपर्छ । एकजना एमाले सांसद हालसालै बलात्कार गरेको आरोपमा पक्राउ परे, ’ उनले भने, ‘यहीँ धनकुटामा पनि यस्ता उदाहरणहरू छन्, तर लुकाएर राखिएका छन् ।
नेता थापाले छिन्ताङ घटनालाई एमालेले अतिरञ्जित गरेको आरोप लगाएका छन् । आफूले प्रतिबद्धता गरे अनुसार छिन्ताङ घटनाका पीडितलाई सहिद घोषणा गरेको तर एमालेले सहिदको नाममा भ्रष्टाचार, लुटतन्त्र र ठगी खाने भाँडो बनाएको उनको आरोप थियो ।
सहिदका परिवारलाई बन्धनमा नबस्न आग्रह थापाले आग्रह गरे । ‘म सहिदका परिवारलाई भन्न चाहन्छु, अब तपाईँहरू उठ्नुस्, उहाँहरूको बन्धनमा बस्ने हैन,’ उनले भने, ‘तपाईँ यो देशको नागरिक हो । आउनुस् प्रजातन्त्रलाई जोगाउन एक भएर हामी काम गरौँ ।’
यसअघि जितेका एमाले सांसदले जनतालाई झुटो आश्वासन दिएर ढाँटेको उनले बताए । ‘एमालेले यसअघि चुनावमा जिताएर पठाए, धनकुटालाई प्रदेश १ को राजधानी बनाउँछौँ भने, तर मलाई अहिले अपसोच लागेको छ, एमालेहरू अहिले कुन दुलोमा लुकेर बसेका छन् ?,’ उनले भने, ‘आगामी निर्वाचनमा एमाले धनकुटामा क्लिन स्विप हुन्छ ।’
