बैतडी । महाकाली राजमार्ग अन्तर्गत बैतडीको दोगडाकेदार गाउँपालिका ३ तारलमा जीप दुर्घटना हुँदा १० जना घाइते भएका छन् ।
बैतडी सदरमुकामबाट बसालीका लागि छुटेको से १ ज २२६ नम्बरको जीप सतबाँझ–सिल्लेगडा सडकखण्डको तारलमा बिहीबार दिउँसो साढे ३ बजे दुर्घटनामा परेको हो ।
दुर्घटनामा परेर बैतडीको दशरथचन्द नगरपालिका-११ का २३ वर्षीय डम्बर महरा, दशरथचन्द नगरपालिकाकै ५५ वर्षीय खेमराज भट्ट, दोगडाकेदार गाउँपालिका-४ का सागर विष्ट, दोगडाकेदार-५ का भीम धामी, सोही ठाउँकै २५ वर्षीय दीपक कार्की, २७ वर्षीय वीरसिंह कार्की, उनकी २५ वर्षीया श्रीमती लक्ष्मी ८ महिने छोरा सौगात कार्की घाइते भएका छन् ।
यस्तै, दोगडाकेदार-५ का १९ वर्षीया दुर्गा धामी र दोगडाकेदार गाउँपालिका-७ का नरेश कार्की पनि घाइते भएका घटनास्थलबाट अस्थायी ट्राफिक प्रहरी पोष्ट सतबाँझका प्रहरी जवान मोहन विष्टले जानकारी दिनुभयाे ।
घाइतेमध्ये डम्बर, खेमराज, भीम, दीपक, वीर, लक्ष्मी र सौगातलाई थप उपचारको लागि डडेल्धुरा पठाइएको छ । अन्य घाइतेहरूलाई उपचारको लागि जिल्ला अस्पताल पठाइएको छ ।
चालकसहित ११ जना सवार जीप दुर्घटनालगत्तै खोचलेक प्रहरी चौकीका इञ्चार्ज मोती बमसहितको प्रहरी टोली र स्थानीय बासिन्दाले घाइतेको उद्धार गरेका थिए । दुर्घटनाग्रस्त जीप सडकबाट ३० मिटर तल खसेको छ ।
पानीले गर्दा सडक सतह चिप्लो र दुर्घटना भएको स्थानको सडक भासिएको जीप दुर्घटनामा परेको खुल्न आएको छ ।
