एमालेको नेतृत्व झापाका केपी शर्मा ओलीले गरिरहेका छन् । १० औं महाधिवेशनबाट सर्वसम्मत अध्यक्ष बन्ने ओलीको योजनामा भीम रावलले चुनौती दिएका छन् । रावलले अध्यक्षमा आफ्नो उम्मेद्वारी घोषणा गरिरहेका छन् ।
एमाले नेता तथा पूर्व सभामुख सुभाष नेम्वाङले वरिष्ठ उपाध्यक्ष बन्ने इच्छा देखाएका छन् । वरिष्ठ उपाध्यक्ष बन्ने लाइनमा ईश्वर पोखरेल पनि छन् । इलामका बासिन्दा नेम्वाङले वरिष्ठ उपाध्यक्ष बन्ने इच्छा देखाए पनि उम्मेद्वारी घोषणा गरेका छैनन् ।
पूर्वमन्त्री लालबाबु पण्डित र एमाले प्रदेश १ अध्यक्ष देवराज घिमिरे उपाध्यक्ष बन्ने दाउमा छन् । झापाका घिमिरेले आफ्नो उम्मेद्वारी घोषणा गरिसकेका छन् । मोरङका बासिन्दा पण्डितले पनि उपाध्यक्षमा रुचि देखाएका छन् । ‘मेरो दाबेदारी पदाधिकारीमा रहन्छ,’ पण्डितले भने, ‘सहमति भयो भने अध्यक्ष र महासचिव बाहेक जुनसुकै पदमा बस्छु, निर्वाचन भयो भने उपाध्यक्षमा उठ्छु ।’
एमाले सचिवमा प्रदेश १ का दुई पूर्व मुख्यमन्त्रीले इच्छा देखाएका छन् । प्रदेश १ का पहिलो मुख्यमन्त्री शेरधन राई र दोस्रो मुख्यमन्त्री भीम आचार्य सचिव बन्ने आन्तरिक लविङमा छन् । भोजपुरका राई र सुनसरीका आचार्य दुवैले उम्मेद्वारी भने घोषणा गरेका छैनन् । आचार्य एमालेको ९ औं महाधिवेशनबाट निर्वाचित सचिव हुन् । आचार्यले सचिवभन्दा तलको पदमा नउठ्ने बताइसकेका छन् ।
यसैगरी संखुवासभाका नेता राजेन्द्र गौतम र पर्शुराम मेघी गुरुङले पनि केन्द्रीय सचिवमा उठ्ने इच्छा देखाएका छन् । तर उम्मेद्वारी घोषणा गरेका छैनन् ।
एमाले केन्द्रीय सचिव योगेश भट्टराई, केन्द्रीय सदस्य हिक्मतकुमार कार्की, केन्द्रीय सदस्य गुरु बराल र भानुभक्त ढकाल पनि सचिवका आकांक्षी हुन् । तीमध्ये बरालले मात्रै उम्मेद्वारी घोषणा गरेका छन् । झापाका कार्की तत्कालीन मुख्यमन्त्री राईको कार्यकालमा प्रदेशमा आन्तरिक मामिला तथा कानूनमन्त्री थिए । कार्की निर्वाचन भए आफू सचिवमा उठ्ने बताउँछन् । ‘सचिवमा मेरो पनि दाबेदारी छ,’ उनले भने, ‘खुला रुपमा निर्वाचन हुनेभए उठ्छु ।’ सहमतिमा टुङ्ग्याउनु पर्ने अवस्थामा स्थायी कमिटीमा दाबी रहने उनले बताए ।
