कुनै स्थानमा समस्या आउने बित्तिकै तत्काल सम्बन्धित स्थल पुगेर मर्मत गर्न नो-लाइटको टिमले मर्मत गरिहाल्ने प्राधिकरणका कार्यकारी निर्देशक कुलमान घिसिङले बताए ।
उनले तिहारमा बत्तीको अभाव नहुने बताएका छन् । यस वर्षको तिहारमा करिब देशभर १५ सय मेगावाट प्रयोग हुनसक्ने प्रक्षेपण गरेको उनको भनाइ छ ।
गत भदौमा प्रणालीमा एकै दिनमा १६२० मेगावाटको पिक लोड आउँदा प्राधिकरणले सहजै व्यवस्थापन गरेको थियो । प्राधिकरणका अनुसार अहिले दिनमा २ सय मेगावाट र रातमा ५ सय मेगावाटसम्म बिजुली माग भन्दा बढी उत्पादन भइरहेको छ ।
अहिले कुलेखानीको विद्युत खेर गइरहेको भन्दै प्रसारणका कारणले तिहारमा कतै पनि विद्युतको अभाव नहुने घिसिङले बताए । घिसिङले आम उपभोक्ताहरुलाई ढुक्कसँग विद्युतीय उपकरणहरु चलाउन पनि आग्रह गरेका छन् ।
‘यो तिहारमा हामीले १५ सय मोगावाट भन्दा बढी लोड आउने अपेक्षा गरेका छैनौं, हामीसँग अहिले करिब २ हजार प्लस मेगावाटभन्दा बढी जलविद्युतको जडित क्षमता छ, १५-१६ सय मेगावाटका आयोजना नियमित अप्रेसनमा छन्,’ उनले भने, ‘कुलेखानी समेत चलाउन सकिने भएकाले बत्ती काट्ने, लोडसेडिङ गर्ने कुनै अवस्था छैन । सबै उपभोक्ताले निर्धक्कसँग तिहारमा झिलिमिली गर्दा हुन्छ ।’
विद्युत् भारप्रेषण केन्द्रका प्रमुख तथा प्राधिकरणका प्रवक्ता सुरेशकुमार भट्टराई लक्ष्मीपूजाका दिनमा उद्योगहरु बन्द हुने र व्यपारिक ग्राहले पनि नियमितको परिमाण्का खपत नगर्ने भएकाले माग व्यवस्थापनमा कुनै दबाव नरहेको बताउँछन् ।
‘प्राविधिक समस्या परेर कतै लाइन काटिनेबाहेक मागका पक्षबाट कुनै खालको समस्या छैन,’ उनले भने,’लक्ष्मीपूजामा अरु दिनभन्दा कम माग आउँछ ।’
