नेकपा एमाले विभाजनको असर प्रदेश सरकारमा पनि पर्न थालेको छ । प्रदेश १ मा केपी ओली पक्षमा रहेका मुख्यमन्त्री शेरधन राई अल्पमतमा पर्ने स्थिति आएपछि आजै एमालेले संसदीय दलको बैठक बोलाएको छ । बैठकले तेस्रो धारबाट एमालेमा विलय भएका भीम आचार्यलाई संसदीय दलको नेता बनाउने तयारी गरेको छ ।
यसअघि एमाले सचिव भीम आचार्य माधव नेपाल पक्षमा रहँदा १८ सांसद माधव नेपालको पक्षमा खुलेका थिए भने ३३ जना ओलीको पक्षमा थिए । तर, तेस्रो धारमा रहेका आचार्य एमालेमै समाहित भएपछि पुरानो समीकरणमा केही फेरबदल आएको छ । अब माधव नेपालको पक्षमा राजेन्द्रकुमार राईसहित ९ सांसद रहेको नेपाल पक्षको दाबी छ ।
भीम आचार्यसँग अन्तरविरोध भएका कारण माधव समूह छाडेर मन्त्री बनेका राजकुमार ओझाले अब भीम आचार्यलाई साथ नदेलान् कि भन्ने माधव पक्षमा आश देखिन्छ ।
संखुवासभाका एमाले नेता पर्शुराम मेघी गुरुङ माधव नेपालतिर नलागी एमालेमै रहेका कारण त्यहाँका दुईजना प्रदेशसभा सदस्य एमालेमै रहन्छन् या माधव पक्षमा अडिन्छन् भन्ने खुलिसकेको छैन । संखुवासभाका दुई प्रदेशसभा सदस्य सरिता खड्का र पदम कुमारी गुरुङ यसअघि माधव समूहमा खुलेर लागेका सांसद हुन् ।
ताप्लेजुङका प्रदेश सांसद बलबहादुर थाम्सुहाङ हिजोसम्म माधव नेपाल समूहकै नेता हुन् । योगेश भट्टराई र तिलकुमार मेन्याङ्बोले माधव नेपालको साथ छाड्दा पनि उनी माधव नेपालकै निकट रहेका सांसद हुन् । तर, उनी पनि अहिले कन्फ्युजनमा परेका छन् ।
इलामकी सांसद खिनु लङ्बा माधव नेपाल समूहकै सांसद हुन् । पाँचथरका सांसद गणेशकुमार काम्बाङ पनि माधव नेपालकै पक्षका हुन् । मोरङका सांसद कृष्ण कुमारी राई, लीलाबल्लभ निरौला र सावित्रा रेग्मी पनि यसअघिसम्म माधव नेपाल पक्षमा खुलेका प्रदेशसभा सदस्य हुन् ।
खोटाङका सांसद राजन राई, भोजपुरका राजेन्द्र कुमार राई माधव एकीकृत समाजवादीको केन्द्रीय कमिटीमै रहेकाले उनीहरु माधव नेपालमा बलिया सारथी हुन् । यीमध्ये राजेन्द्र राई गठबन्धनका तर्फबाट मुख्यमन्त्रीका दाबेदारसमेत हुन् । उदयपुरकी सांसद सुनिता कुमारी चौधरी पनि माधव नेपाल समूहकै हुन् ।
यीमध्ये माधव नेपाल समूहका राजन राई, राजेन्द्र राई, शावित्रा रेग्मी, सुनिता चौधरी र कृष्णा राईले मात्रै माधव नेपाललाई साथ दिने हो भने पनि एमालेको बहुमत गुम्ने अवस्स्था छ ।
भीम आचार्य मुख्यमन्त्री बनेर एक महिनापछि विश्वासको मत पाउन सकेनन् भने त्यसपछि गठबन्धनका तर्फबाट राजेन्द्र राई मुख्यमन्त्री बन्ने सम्भावना रहेको नेताहरुको आकलन छ ।
