काठमाडौं । निर्वाचन आयोगले रिक्त रहेको राष्ट्रियसभा सदस्य पदमा जेठ ६ गते उपनिर्वाचन गर्ने भएको छ ।
बिहीबार बसेको आयोगको बैठकले वाग्मती प्रदेश अन्तर्गतको अन्य समूहतर्फबाट रिक्त राष्ट्रियसभा सदस्य पद पदपूर्तिका लागि उपनिर्वाचन घोषणा गरेको हो ।
यो समूहमा नेकपा माओवादी केन्द्रबाट निर्वाचित राष्ट्रियसभा सदस्य रामबहादुर थापा बादल हालै दल त्याग गरेका कारण पदमुक्त भएका थिए ।अब उपनिर्वाचन हुँदा सो पदमा नेकपा एमालेबाट गृहमन्त्री रामबहादुर थापा ‘बादल’ नै पुनः उम्मेदवार बन्ने चर्चा छ ।
‘राष्ट्रिय सभाको रिक्त स्थानमा बादल कमरेड नै उठ्ने हो । उहाँलाई नै उठाउने हो’ नेकपा एमाले राष्ट्रिय सभा संसदीय दलका नेता सुमनराज प्याकुरेलले भने ।
यद्यपि एमालेले उक्त पदमा कसलाई उम्मेदवार बनाउने भन्नेबारे निर्णय गरेको छैन ।
वाग्मती प्रदेशमा दलहरुको अंकगणित
राष्ट्रिय सभा सदस्य निर्वाचनमा प्रदेश सभा सदस्य र स्थानीय तहका प्रमुख र उपप्रमुखले मात्र मतदान गर्न पाउनेछन् ।
वाग्मती प्रदेशसभा सदस्य ११० जना र प्रदेशका १३ जिल्लाका ११९ स्थानीय तहका प्रमुख र उपप्रमुख गरी २३८ जनाले मतदान गरी वाग्मती प्रदेशबाट निर्वाचित हुने राष्ट्रियसभा सदस्य चयन गर्छन् । त्यसैले राष्ट्रियसभा सदस्य निर्वाचनमाको निर्वाचित हुन्छ भन्ने विषय पूर्वानुमानयोग्य नै हुन्छ । तर नेकपा एमालेमा अध्यक्ष केपी शर्मा ओली र माधवकुमार नेपाल पक्षबीचको बेमेलका कारण राष्ट्रियसभा सदस्य निर्वाचनमा पनि फ्लोर क्रस हुने कतिपयको आँकलन छ ।
११० सदस्यीय प्रदेशसभामा एमालेका ५६, माओवादी केन्द्रका २३, नेपाली कांग्रेसका २३, विवेकशील साझा पार्टीका ३, राष्ट्रिय प्रजातन्त्र पार्टी र नेपाल मजदुर किसान पार्टीका २/२ जना छन् । जनता समाजवादी पार्टीबाट निर्वाचित १ जना हाल कांग्रेस तिर छन् ।
एमालेका ५६ जना सांसद केपी शर्मा ओली र माधव नेपाल पक्षमा विभाजित छन् ।
गत पुस १० गते मुख्यमन्त्री पौडेलविरुद्ध अविश्वास प्रस्ताव ल्याउँदा एमाले माधव पक्षका २२ जना र माओवादी केन्द्रका २३ जनाले हस्ताक्षर गरेका थिए । यसलाई आधार मान्ने हो भने हाल प्रदेश सभामा केपी शर्मा ओली पक्षमा ३२ र माधव नेपाल पक्षमा २२ जना सांसद प्रदेश सभा सदस्य छन् ।
यस्तै, स्थानीय तहका २३८ मतदातामध्ये एमालेको १३३ जना, कांग्रेसको ६७, माओवादी केन्द्रको ३३, राप्रपाको २, नेमकिपा २ र जसपाका १ जना छन् ।
१३३ मा ओली पक्ष र माधव नेपाल पक्षका कति कति छन् भनेर छुट्याउन गाह्रो रहेको नेताहरु बताउँछन् ।
वाग्मती प्रदेशसभा सदस्य अष्टलक्ष्मी शाक्य भन्छिन्, ‘प्रदेश सभाको करिब करिब प्रष्टै छ । केही संख्या यताउति भइहाल्छ तर, स्थानीय तहको हकमा यसै भन्न सकिने अवस्था छैन ।’
तथापि, आफूहरु (माधव नेपाल समूह) तर्फ स्थानीय तहका केही जनप्रतिनिधि रहेको शाक्यको दाबी छ ।
तथ्याङ्कले वाग्मती प्रदेशमा एमालेको राष्ट्रिय सभा सदस्यको उपचुनावका मतदाता बहुमतमा रहेको देखाउँछ ।
तर, एमाले पुरै एकढिक्का भएर भोट दिन्छन् भन्नेमा आशंका छ ।
कर्णाली प्रदेशमा माओवादी केन्द्रको नेतृत्वको सरकार एमाले ओली पक्षले ढाल्न खोज्दा एमाले माधव नेपाल पक्षले बचाइदिएको खबर ताजै छ ।
