भक्तपुर । संस्कृति शिरोमणि हरिराम जोशीद्वारा लिखित पछिल्लो पुस्तक ‘मेरा अनुभूतिहरु’ हिजो एक कार्यक्रमबीच विमोचन गरिएकाे छ । नेमकिपाका वरिष्ठ नेता नारायण मान विजुक्छेको प्रमुख आतिथ्यतामा सो कार्यक्रम सम्पन्न भएको हो ।
प्रमुख अतिथि विजुक्छेले राज्यले चिन्न नसकेका संस्कृतिविद् हरिराम जोशीलाई भक्तपुरले चिनेको १६ वर्ष भएको बताउँदै उनको पछिल्लो पुस्तक भक्तपुरबाटै प्रकाशित गर्न पाउँदा गौरवान्वित भएको बताए ।
कार्यक्रममा प्रा. डा पुरुषोत्तमलोचन श्रेष्ठले पुस्तकको बारेमा समीक्षा गर्दै निज जोशी तर्क सम्राट, शिष्यहरुका महागुरु एवं एकल विश्वविद्यालय भएको बताए ।
८६ औं बसन्त पार गरिसकेका संस्कृति शिरोमणि जोशीले वि.सं. २०१० सालदेखि समाजको विकासबाट आफ्नो लेखनी यात्रा शुरु गरेका थिए । नेपालको इतिहास, धार्मिक, सांस्कृतिक र वैदिक चिन्तनलाई समय सापेक्षरुपमा आफ्नो तार्किक अभिमतद्वारा विश्लेषण गरिएको पछिल्लो पुस्तक हो ‘मेरा अनुभूतिहरु’ ।
