काठमाडौं । प्रधानमन्त्री एवं नेकपा एमालेका अध्यक्ष केपी शर्मा ओलीले पार्टीले बोलाएको चियापानमा नआएर कसको निम्तामा जाने भन्दै माधवकुमार नेपाल पक्षका नेताहरूलाई प्रश्न गर्नुभएकाे छ ।
मंगलबार बालुवाटारमा केन्द्रीय समितिका सदस्यहरूको जमघटका लागि आयोजना गरिएको चियापान समारोहमा बोल्दै ओलीले पार्टी अध्यक्ष र प्रधानमन्त्रीले बोलाएको चियापानमा नआएर कसले बोलाएमा जानुहुन्छ भन्दै प्रश्न गर्नुभयाे ।
प्रधानमन्त्री ओलीले माधवकुमार नेपालप्रति कटाक्ष गर्दै पार्टीले बोलाएको चियापानमा बैठक बसेरै नआउने निर्णय गरेको भन्दै व्यङ्ग गर्नुभयो । ‘एकथरी अनुहारका साथीहरू चियापानमा देखिनुभएन, हिजो बेलुकी बैठक बसेर पार्टी अध्यक्षको चियापान नजाने भनेर निर्णय गर्नुभएछ,’ उहाँले भन्नुभयो, ‘पार्टी अध्यक्ष र प्रधानमन्त्रीको निमन्त्रणा र चियापान नजाने, कसको निम्ता र चियापानमा जानुहुन्छ ?’
ओलीले माधव समूहका नेताहरू नआउनु राम्रो लक्ष्यण नभएको टिप्पणी गर्नुभयाे । ‘कुनै कारणबस भ्याउनुभएन होला भन्ने म ठान्छु, चियापान नआउने निर्णय गर्नुभएन होला भन्ने म ठान्छु,’ उहाँले भन्नुभयो, ‘अझै केही समय बाँकी छ, भोलिको भेला गर्नुहुन्छ कि गर्नुहुन्न, कति तमासा गर्नुहुन्छ, एक नजर चाहिँ त्यता राखिनेछ ।’
ओलीले पार्टीलाई धम्क्याएर र धुर्क्याएर ठेगान लगाउने नसोच्न आग्रह गर्दै विधिविधान अनुसार पार्टी चल्ने स्पस्ट पार्नुभयो । नचाहिने कुराका अगाडि पार्टी नझुक्ने स्पस्ट पार्दै उहाँले सत्यसँग नलड्ने, निउँखोजहाहरूसँग नझुक्ने आफूहरूको नीति रहेको बताउनुभयो ।
ओलीले कसैले उक्साहट र विभिन्न हल्ला फैलाएर आवेश र उत्तेजनामा ल्याउन खोजे पनि संयम र गम्भीर हुन नेता तथा कार्यकर्तालाई आग्रह गर्नुभयो । यद्यपि आफूहरू लाचार भने नबन्ने उहाँकाे भनाइ छ ।
