आज (शनिबार) बिहान माओवादी केन्द्रको पेरिसडाँडास्थित कार्यालयमा जसपाका नेताहरुसँग छलफल भएको थियो । उक्त छलफलमा माओवादी केन्द्रले जसपासँग आगामी चुनावसम्मका लागि कार्यगत एकता गरेर सँगै जाने प्रस्ताव गरेको हो ।
स्रोतका अनुसार जसपाका नेताहरु नयाँ सरकारको समीकरणबारे छलफल गर्न पेरिसडाँडा पुगेका थिए । सो क्रममा सरकारमा मात्र नभएर चुनावसम्मै कार्यगत एकता गरेर जाने प्रस्ताव माओवादी केन्द्रले गरेको बताइएको छ ।
छलफल सकारात्मक रहेको र सरकार तथा चुनावसम्म सहकार्य गर्न सकिने जसपाका नेताहरुले माओवादीका नेताहरुसामु प्रतिक्रिया जनाएका थिए ।
साे क्रममा दुवै पार्टीबीच प्रधानमन्त्री एवं नेकपा अध्यक्ष केपी शर्मा ओलीको सर्वसत्तावादलाई परास्त गर्नेगरी एकै ठाउँ उभिने विषयमा समेत छलफल भएकाे बताइएकाे छ । जसपा अध्यक्ष उपेन्द्र यादवले ओलीको सर्वसत्तावादलाई परास्त पार्ने विषयमा माओवादी केन्द्रसँग छलफल भएको र दुवै पार्टीले कार्यगत एवं रणनैतिक माेर्चा बनाउने बताए ।
उनले ओली नेतृत्वकाे सरकारमा भने कुनै हालतमा पनि सहभागी हुन नसकिने प्रतिक्रिया दिए । छलफलबाट बाहिरिने क्रममा यादवले भने, ‘बैठकमा ओलीको सर्वसत्तावादलाई परास्त पार्ने विषयमा छलफल भयो । हामी यही सरकारमा सहभागी हुँदैनाैँ ।’ यादवले नेपाली कांग्रेससँग पनि यही विषयमा छलफल भएकाे र चाँडै नै ओलीलाई सरकाबाट हटाउनेबारे तीन दलबीच छलफल हुने जानकारी समेत दिए ।
