भारत,/ भारतमा कोरोना भाईरस (कोभिड-१९) संक्रमण पुनः देखिन थालेको छ । भारतको महाराष्ट्र राज्यमा कोरोना संक्रमण बढ्न थालेपछि आज (सोमबार) देखि राजनीतिक, धार्मिक तथा सामाजिक कार्यक्रम गर्न रोक समेत लगाइएको छ ।
आइतबार टीभीमार्फत नागरिकलाई सम्बोधन गर्दै महाराष्ट्र राज्यका मुख्यमन्त्री उद्धव ठाकरेले केही दिनसम्म भीडभाड हुने कुनै पनि कार्यक्रम गर्न नपाइनेगरी प्रतिबन्ध घोषणा गरेका हुन् । उनले भनेका छन्, ‘महामारीले हाम्रो राज्यमा फेरि टाउको उठाउँदै छ । लकडाउनबाट मात्र कोभिड-१९ समाधान हुँदैन तर भाइरसको फैलावटलाई रोक्न यो एक मात्र विकल्प हो ।’
संक्रमण बढेसँगै नासिकमा राति ११ बजेदेखि बिहान ५ बजेसम्मका लागि रात्रिकालिन कर्फ्यू लगाइएको छ । खाद्य र नागरिक आपूर्ति, उपभोक्ता मामिला मन्त्री छागन भुजबालले सोमबारदेखि लागु हुने गरि रात्रिकालिन कर्फ्यू लगाइएको बताएका हुन् ।
यद्यपि दुध, अखबार, अस्पताल सेवाहरू जस्ता अत्यावश्यक सेवाहरू भने यसमा नपर्ने बताइएको छ । यस्तै, महिनाको अन्त्यमा थप समीक्षा हुने बताइएको छ । उता, जिल्ला कलेक्टर जितेन्द्र पापलकरले अकोला, मूर्तिजापुर र अकोटमा फेब्रुअरी २३ देखि मार्च १ सम्म लकडाउनको घोषणा गरेका छन् । यता, ओडिशा सरकारले कोभिड १९ को सुरक्षा मार्गनिर्देशनहरूको कडा कार्यान्वयन सुनिश्चित गर्न सबै जिल्ला कलेक्टरहरूलाई निर्देशन दिएको छ ।
भारतमा केही दिनयता ६ राज्यमा संक्रमित बढेपछि कोरोनाको दोस्रो लहर आउनसक्ने चिन्ता देखिएको छ । पछिल्लो समय पुष्टि भएका संक्रमितमा नयाँ भेरियन्ट पनि देखिएको छ। जुन यसअघि बेलायतमा देखिएको थियो। संक्रमितको संख्या फेरि बढ्नु र नयाँ भेरियन्ट देखिँदा भारतमा दोस्रो लहर आउनसक्ने विज्ञहरूले अनुमान गरेका छन्।
भारतीय स्वास्थ्य मन्त्रालयको तथ्यांकअनुसार, निको हुनेभन्दा संक्रमितको संख्या बढी हुन थालेको छ। संक्रमण बढ्दै गएका ६ राज्यमा महाराष्ट्र, केरल, मध्यप्रदेश, गुजरात, राजस्थान र दिल्ली छन्।
