काठमाडौं । अनौपचारिक क्षेत्र सेवा केन्द्र(इन्सेक)ले २६औं मानव अधिकार पुरस्कार डा. रुपचन्द्र विश्वकर्मालाई प्रदान गरेको छ ।
मंगलबार मानवअधिकारवादी योद्धा स्व. प्रकाश काफ्लेको २८औं स्मृति दिवसको अवसरमा आयोजित कार्यक्रममा डा. विश्वकर्मालाई २६औं मानवअधिकार पुरस्कार २०७६ प्रदान गरिएको हो ।
बाजुरा जिल्लाको बुढीनन्दा नगरपालिका–५ का स्थायी बासिन्दा डा. विश्वकर्मा बाजुरा जिल्लाको नागरिकको स्वास्थ्य सेवामा सर्मपित व्यक्तित्वको रूपमा परिचित हुनुहुन्छ । ३ वर्षदेखि बाजुरामा रहेर नागरिकको स्वास्थ्य सुधारका लागि पहलकदमी गर्दै दुर्गम जिल्लामा बसी स्वास्थ्य सेवा सुधार र विपन्न वर्गको पहुँच अभिवृद्धिको काम गरेकाले सम्मान गरिएको इन्सेकका कार्यकारी निर्देशक विजयराज गौतमले बताउनुभयो ।
३ वर्षअघि बाजुरा विमानस्थलमा भएको हवाई दुर्घटनाको घाइतेलाई उद्धार गरी सुविधा सम्पन्न अस्पताल लैजाने क्रममा जहाजभित्रै आपतकालीन उपचार गरी घाइतेलाई बचाएपछि उहाँको चर्चा चुलिएको थियो । सम्मान पछि डा. विश्वकर्माले सम्मान आफ्नो मात्रै सम्मान नभइ बाजुरा जिल्लामा बस्ने सम्पूर्ण स्वास्थ्यकर्मी र अस्पतालको नै भएको बताउनुभयो ।
कार्यक्रममा बोल्दै अनौपचारिक क्षेत्र सेवा केन्द्र (इन्सेक)का संस्थापक अध्यक्ष सुशील प्याकुरेलले पहिले आर्थिक, सामाजिक अधिकारको कुरा गर्दा प्रजातन्त्र, लोकतन्त्रवादी हुँदैनन् भन्ने जमानालाई तोड्दै आफूहरू मानवअधिकारको क्षेत्रमा अघि बढिरहेको बताउनुभयो ।
