कैलाली । सुदूरपश्चिम प्रदेशमा ६ महिनामा ३९ हजार ३०० बढी सवारी साधन कारवाहीमा परेका छन् । चालु आर्थिक वर्षको छ महिनामा सुदूरपश्चिम प्रदेशका नौ जिल्लामा ट्राफिक नियम उल्लंघन गर्ने ३९ हजार ३९३ सवारी साधन कारवाहीमा परेका सुदूरपश्चिम प्रदेश ट्राफिक प्रहरी कार्यालय अत्तरियाले जानकारी दिएको छ ।
ट्राफिक प्रहरी कार्यालय अत्तरियाको तथ्यांकअनुसार महिनाको अवधिमा सबैभन्दा बढी मंसिर महिनामा आठ हजार ३४० र कम भदौमा तीन हजार ५५६ सवारी साधन कारवाहीमा परेका छन् ।
कारवाहीमा परेका सवारी साधनबाट दुई करोड २८ लाख ६७ हजार ५०० राजस्व संकलन भएको सुदूरपश्चिम प्रदेश ट्राफिक प्रहरी कार्यालय अत्तरियाका प्रवक्ता प्रहरी निरीक्षक मोहनबहादुर साउदले जानकारी दिनुभयो ।
यस वर्ष ट्राफिक नियम बढी उल्लंघन भएका र नयाँ प्रविधिको प्रयोगले सवारी साधन बढी कारवाहीमा परेका प्रवक्ता साउदको भनाइ छ । सुदूरपश्चिममा यस वर्षको छ महिनामा ३३४ सवारी दुर्घटना भएका छन् ।
तीन सय ३४ दुर्घटना हुँदा ४२७ सवारी साधनमा क्षति भएको छ भने ९९ को मृत्यु भएको छ । यो अवधिमा ३२० गम्भीर र २९० सामान्य घाइते भएका छन् ।
यता महाकाली राजमार्गअन्र्तगत बैतडीको दोगडा केदार खण्डको चम्तडीमा पनि शंकास्पद वस्तु फेला परेको छ । अज्ञात समूहले रातो कपडामा तार बेरेर राखेको शंकास्पद वस्तु फेला परेपछि स्थानीयले प्रहरीलाई खबर गरेका थिए ।
