८ चैत, रामेछाप । बिहीबार सुरु भएको एसईई परीक्षामा रामेछाप जिल्लाको धोवी परीक्षा केन्द्रबाट एक किरियापुत्रीले परीक्षा दिएका छन् ।
झटेश्वर मावि परीक्षा केन्द्रबाट ५ दिनका किरियापुत्री सवन महतले परीक्षा दिएको स्रोत व्यक्ति वीरेन्द्र सहनीले बताए ।
मन्थली माविका विद्यार्थी महतका बाबुको ५ दिनअघि मृत्यु भएको थियो । कठजोरस्थित निलकण्ठेश्वर मावि स्रोत केन्द्रबाट परीक्षा दिनुपर्ने महतलाई घर नजिक पर्ने झटेश्वर मावि परीक्षा केन्द्रमा परीक्षा दिने व्यवस्था मिलाएको हो ।
उनले झटेश्वर मावि परीक्षा केन्द्रबाट परी दिए पनि उत्तरपुस्तिका निलकण्ठेश्वर परीक्षा केन्द्रमा लगिने स्रोत व्यक्ति सहनीले बताए ।
यस वर्षको एसईई परीक्षामा रामेछाप जिल्लाबाट १ हजार ७ सय ६७ छात्र र २ हजार ८३ छात्रा गरी कुल ३ हजार ८ सय ५० विद्यार्थीले परीक्षा दिएका छन् ।
जिल्लामा २१ वटा परीक्षा केन्द्रमा पहिलो दिन अंग्रेजी विषयको परीक्षा शान्तिपूर्ण रुपमा सकिएको जिल्ला शिक्षा अधिकारी दिनानाथ गौतमले जानकारी दिए ।
