स्थानीय वायूको प्रभावले आइतबार अपरान्ह काठमाडौं उपत्यकासहित देशका पूर्वी र पश्चिमी पहाडी क्षेत्रमा असिना पानी परेको छ।
गर्मी मौसम सुरु भएसँगै बन्ने स्थानीय मौसम प्रणाली कारण पानी परेको जल तथा मौसम पूर्वानुमान महाशाखाले जनाएको छ।
महाशाखाकी मौसमविद् शान्ति कँडेलले साँझ ६ बजेपछि पानी पर्ने क्रम रोकिने र मौसम सफा हुने बताइन्।
‘तर भोलि अपरान्हतिर फेरि मेघ गर्जनसहित पानी पर्ने सम्भावना छ,’ कँडेलले भनिन्।
नेपालमा प्रायः बर्खामा बंगालको खाडीबाट आउने वायू र हिउँदमा पश्चिमी वायूको प्रभावले पानी पर्ने गर्छ।
हिउँद सकिएपछि मनसुन सुरु हुनुअघि भने स्थानीय वायूको प्रभावले साँझपख हावाहुरी चल्ने, मेघ गर्जनसहित असिना पानी पर्ने हुन्छ।
